Declaration des noms propres.
ET MOTZ DIFFICILES CONTENUZ
EN VITRUVE.

[LO] ABstemien signifie homme hayant l'odeur et la saveur du vin, ou qui n'en boit point de sa nature.
Achante est une herbe que les Herbiers nomment Branque ursine, et les Jardiniers patte d'Ours.
Accius fut un Poëte tragique, né de pere et mere libertins: c'est à dire qui apres avoir esté serfz, meriterent pour leur bon service, d'estre mis en liberté. Ce Poëte florissoit à Rome durant le consulat de Macrinus, et de Seran. Vray est que sa poësie estoit estimée un peu dure: toutesfois Decius Brutus en faisoit si grand compte qu'il en decoroit temples et sepultures, mesmes encores que ledict Poëte feust petit de corps: si luy feist icelluy Brutus faire une grande statue, laquelle fut mise au temple des Camenes ou Muses, qui pour lors estoit à Rome.
Acroasie signifie une audience publique, ou bien harangue faicte en presence d'une grande assemblée de peuple.
Acroteres sont promontoires, ou lieux que l'on veoit de loing en la Mer: mais dedans Vitruve ilz se prennent pour certains petitz pilastres ou piedestalz, aucunesfois chargez de figures, et aucunesfois non, qui se mettent joignant les boutz, et sur le mylieu d'un {dv'n} frontispice.
Acrouatique, signifie tout engin propre à lever fardeaux amont.
Acte de terre, est un espace contenant quatre piedz de large, et six vingtz de long: toutesfois celluy qui est quarré perfect contient six vingtz piedz de tous costez, et le quarré double, faict ce que nous disons un Arpent.
Africus, est un vent de Midy.
Agetor de Bizance, est le nom propre d'un homme qui fut Architecte.
Albula selon aucuns, est le fleuve qui passe a Rome, maintenant appellé le Tybre: et selon d'autres est un Marais produisant Soulphre, lequel se treuve en allant de Rome a Tivoli.
Alexandrie, est une bonne ville en Egypte, laquelle y fut edifiée par Alexandre le grand, et encores porte son nom.
Alexis fut un poëte Comique, premierement appellé Sybaris, il estoit autant le temps de Menander.
Alge, est ceste meschante herbe qui naist en la Mer, ou dedans les Estangz.
Altin, fut une ville au territoire de Venise.
Amphireusis, est une grande roue comme celle d'une Grue, au moyen de laquelle s'enlievent gros fardeaux.
Amphiprostyle, est une sorte de bastiment ayant toutes les particularitez de celluy qui est dict prostyle: mais il à d'avantage en son fons des colonnes et frontispice, aussi bien qu'en la face du devant.
Afrique, est l'une des trois parties du monde, elle prend son commencement aux fins d'Egypte, et s'estend du costé de Midy passant par l'Ethiopie, jusques a la montaigne Atlas, du costé de Septentrion, elle est bornée de la Mer mediterrane, et finit aux Gades que l'on dict maintenant le destroit de Gibraltar. Ces provinces ou pays sont Lybie, Cyrene, Pentapoly, Byzance, Carthage, et Numidie. Aucuns divisent ceste Afrique en grande, et petite, disans que ladicte petite à Numidie du costé d'Occident, et devers Orient Cyrene: mais que par ou elle regarde le Septentrion: cela est borné de la Mer mediterrane (comme dict est) la grande commence au Midy, et s'estend jusques à l'Occident, elle est située entre Asie, et Europe, et fut antiquement nommée Afrique, d'un Afer successeur d'Abraham, lequel mena la une compagnie de gens pour y habiter: et de faict apres plusieurs guerres s'en feit maistre et seigneur paisible.
Ammon est un surnom qui fut antiquement donné a Jupiter, quand il se transforma en Mouton, pour monstrer a son filz Bacchus, passant par les desers de Lybie, une fontaine d'eaue fraische, afin de rassasier son armee qui mouroit de soif. Aucuns veulent dire que ce Mouton frappa du pied sur le sable, dont il sourdit une fontaine: a raison dequoy les Grecz donnerent au susdict Jupiter le surnom d'Ammonios, qui vault autant a dire que sablonnier: car Ammon en leur langue signifie du sablon.
Amintas estoit un Roy de Macedoine qui fut grand pere d'Alexandre.
Amaxopodes sont arbres debout, vuydes ou qui ont des enfourchemens par le mylieu, au travers desquelz sont mises des roues pour faire cheminer engins ou machines de guerre, en tous costez qu'il plaist à l'Enginier.
Anaporiques sont Horloges retournans par traict de temps sur lepoinct ou premierement ilz avoient esté ordonnez.
Anatones sont resonances egales de cordes d'Arc, ou Arbalestes, quand on les à bandées autant qu'il est requis.
Analemme signifie un pourgect sur lequel se fonde toute l'intention d'un ouvrier: mais ou Vitruve en parle, il veult seulement entendre la compassure des Quadrans de muraille.
Anaxagoras fut un grand philosophe naturel, de noble lignée et bien riche, mais il laissa toutes ses richesses pour contempler plus a son ayse les merveilleux secretz de la Nature.
Ancons ou Prothyrides, sont proprement crochetz de fer attachez aux voultes des Caves, sur quoy l'on mect des aiz pour y garder ce que l'on veult: mais en Vitruve ilz se prennent pour gons de Portes.
Andromeda fut fille de Cepheus Roy d'Ethiopie, et de Cassiopé sa femme, laquelle par grand orgueuil se ventoit estre plus belle que les Nereides nymphes de la mer, en hayne dequoy elles prindrent sa fille Andromeda, et la lierent contre un rocher, afin de la faire devorer a un monstre marin: mais Perseus l'en delivra, et feit mourir ce monstre, puis espousa la belle qu'il mena en son pays, ou elle regna longuement, avec luy, et a la fin par le benefice de Minerve fut colloqué au ciel entre les estóilles, et ce pour le grand bien que ceste Déesse vouloit a Perseus, le congnoissant bon et vertueux prince.
Andronitides sont lieux ou les hommes Grecz se souloient retirer pour banqueter, sans empeschement de femmes.
Angiportes sont proprement petites ruelles estroictes, tortues et difficilles à passer ou bien qui n'ont {n ont} fors une entrée sans yssue, mais on les met aucunesfois pour tous chemins par ou lon apporte vivres à la ville, et autres choses propices aux usages des habitans, mesmes peuvent signifier toutes voyes publicques.
Angles sont coingz ou extremitez de toutes choses.
Anchibates ou Enchibates sont choses prochaines d'une profondeur.
Anisocyles, sont engins à rouages, qui se peuvent facillement mener de tous costez selon le bon plaisir des hommes.
Anses sont boutz de cordes nouez en maniere d'un las.
Anterides ou Erismes sont contrefors de fondemens, autant separez les uns des autres que ledict fondement peult avoir de hauteur, depuis son fons jusques à rez de chaussée.
Asie est le nom d'une des trois parties du monde, mais beaucoup plus grande que les autres. Ceste la se divise en deux parties, assavoir grande, et petite: elle commence en Inde orientale, sa separation d'avec l'Europe se fait par le fleuve Tanais, et de l'Afrique, par le Nil. Le nom d'Asie luy fut donné (comme veulent aucuns) par une nymphe ainsi appellée, laquelle fut fille de l'Occean, et de Tethis, puis espouse de Japetus: mais Herodote escript le contraire, disant que ceste Asie estoit mere de Prometheus, encores en est il d'autres qui tesmoignent que ce nom luy fut imposé par un Asius filz de Maneus Lydien, qui de son temps regna en elle. Au regart de moy je ne puis juger quele opinion est la meilleure, mais tant y a que je treuve qu'Asie est le nom d'un grand maraiz, en la region de Lidye, prochain du fleuve Cayster, et cestuy la (selon mon jugement) pourroit bien avoir donné son nom {non} à toute la contrée.
Anthiochus fut un roy de Syrie en Judée, descendant de Seleucus Nicanor premier fondateur de la ville d'Antioche.
Antibase vault autant à dire comme une contrebase ou entablement.
Antipater fut un philosophe poete de la secte Stoique, natif de la ville dicte Sydon, ou Tyr en Phenicie, qui depuis le premier jour de sa vie, jusques à celluy de sa mort fut tousjours travaillé de fievre, ce neantmoins il vescut assez long aage, mais finablement il mourut de sa fievre.
Antiborée est une espece d'horloge tout au contraire des autres: car communement tous se tournent devers le midy, et cestuy la se met opposite au Septentrion ou Nort que plusieurs nomment Transmontane.
Apennin est le nom de la montaigne qui s'estend tout au long, et par le mylieu d'Italie, elle commence a Gennes, et continue jusques en Sicile, mais le dos de sa cambrure va regardant la mer Adriatique, autrement dicte Venitienne, ou mer d'amont et le dedans de ladicte cambrure voit la mer Tyrrene, que lon dict communement d'aval.
Appollonie est le nom d'une ville antique.
Apollo fut un dieu qui souloit estre adoré par les gentilz, les Grecz le nommoient Phebus qui signifie le soleil. Ce dieu avoit diverses puissances, assavoir d'ayder aux poetes à bien faire leurs ouvrages, de predire les choses advenir, de bien tirer de l'arc, d'estre chef de la medecine, et de bien sonner de la lyre. A ceste cause nous en voyons trois signes environ son ymage asavoir la lyre qui represente l'harmonie celeste, et le bouclier qui le signifie n'estre subject aux offenses humaines, puis ses sagettes qui demonstrent la puissance de punir les meffaictz.
Apulia est un pays au royaume de Naples, que l'on dict maintenant la Pouille pres Calabre.
Aquarius ou verseur d'eau est l'un des douze signes du ciel, qui regne tous les ans au moys de Janvier.
Aquilée est une cité au domaine des Venitiens.
Arabie est un grand pays d'Asie la majeur, située entre Judée et l'Egypte, il se divise en trois parties, dont la premiere est dicte heureuse, la second pierreuse, et l'autre deserte.
Arade est le nom d'une cité antique.
Araignée est une description de lignes sur le dos d'un Astrolabe, ou instrument propre à congnoistre les haulteurs du Soleil, et autres choses convenables aux Astrologues, et Geometriens.
Arbuscules ou Amaxopodes cy dessus specifiez sont une mesme chose, et signifient autant comme piedz causans le mouvement d'un Charroy.
Arcardie est une partie de la region d'Achaie, qui est des appartenances du pays de Peloponesse en la Grece, et est ceste Arcardie mediterrane: c'est à dire de tous costez eslongnée de la Mer, et si est merveilleusement bossue de montaignes, qui faict que ses habitans sont pour la plus part gardiens de bestail.
Archimedes fut un grand Mathematicien: c'est à dire homme bien meslé de plusieurs bonnes sciences, et entre autres d'Astrologie, Geometrie, et Arithmetique ou art de nombrer, et sur tout souverain enginier. Sa naissance fut en Siracuse ville de Sicile située au pied de la montaigne Pachin d'ou sort la fontaine Arethuse. Il feit une foys une Sphere de verre, en laquelle par admirable industrie, tous regardans povoient veoir les contraires mouvemens des cieulx: Il florissoit au temps que Marcus Marcellus capitaine Romain assiegea Syracuse, avant la prise de laquelle il deffendit expressement à tous ses soldatz, qu'aucun ne fust si hardy de faire mal audict Archimedes: Et nonobstant ainsi que le povre homme estoit ententif de tout son esprit avec le corps, à former quelques figures de Geometrie, pour faire des engins nuysibles aux Romains. Il fut tué par un soldat furieux qui ne sceut avoir la congnoissance de ce Philosophe tant et si curieusement recommandé.
Archytas fut un Philosophe de la ville de Tarente en Calabre, qui florissoit au temps que Platon veint en Sicile, au mandement de Denys le tyrant, et qui advertit secretement par une lettre ledict Platon que ce Roy malheureux le vouloit faire mourir: au moyen dequoy a grand haste se retira.
Architecte signifie un homme de bon entendement qui prend sur soy la conduicte d'un edifice.
Architrave est comme un sommier de pierre, ou de charpenterie qui se met au dessus d'un estage, pour en continuer des autres en montant.
Arctos ou Helice est une estoille assez prochaine du pole arctique, dict aucunesfois le Septentrion, par autres le Nord, et par aucuns la Transmontane: toutesfois les Astrologues et Poetes la nomment communement la grande Ourse.
Arcturus {A cturus} ou Arctophilax est aussi une autre estoille, et signifie gardien ou queue de l'Ourse.
Ardea fut une cité antique, principale du pays des Rutuliens, dont Turnus estoit Roy et, n'estoit eslongnée que de dixhuict mille, qui vallent neuf lieues francoises, de la place ou fut fondée, et encores est de present la ville de Rome.
Aire est proprement une planure de terre, vuyde et sans aucuns empeschemens, ou l'on bat les gerbes apres moyssons, mais Vitruve en use quelque foys en autre signification, {significatiou} et par especial pour aisances dictes entre les ouvriers Paelliers, qui se practiquent sur encoigneures de montées à viz.
Areopage estoit le lieu ou se tenoit le conseil des Senateurs Atheniens, qui jugeoient par nuyt des crimes dignes de mort, afin que l'on ne prinst garde aux qualitez, piteux visages, et excuses, de ceulx qui se vouloient justifier par eulx mesmes, ou par advocat: mais seulement a ce qui estoit a faire selon la rigueur de Justice.
Areostile est une certaine assiete de colonnes qui est assez exposée dedans le texte.
Arezzo est une ville de Tuscane, en la duché de Florence, qui fut edifiée parles Grecz, des le temps que le peuple d'Israel estoit soubz le gouvernement des Juges.
Argestes est un vent froid et humide, qui vient de l'Occident equinoctial.
Argille est une terre assez congneue entre les ouvriers, parquoy je n'en feray autre mention.
Arges fut une antique cité bien fameuse, en la region de Peloponesse, et si voisine d'Athenes que les habitans de ces deux usoient d'un Puy commun, parquoy les autres peuples, les nommerent Fratrié: toutesfois il y a eu plusieurs autres citez de ce nom d'Arges, tant en la Grece qu'en Italie.
Argo fut le Navire qui porta Jason en Colchos, ou il conquit la toyson d'or. Les Poëtes ont fainct que ce Navire fut ravy au ciel, et le mettent entre les signes.
Aries est une machine de guerre que je nomme souventesfois Belliniere, pource que comme les Belliers s'entreheurtent, ainsi heurtoit ce tourment les murailles des villes assaillies, par telle impetuosité, et si tresdru qu'elle les faisoit venir à terre.
Aristarchus fut un Mathematicien de l'isle de Samos, lequel inventa diverses manieres d'Horloges.
Aristote est communement estimé le prince de tous les Philosophes.
Aristophanes est le nom de deux hommes, dont l'un fut de Bizance, maintenant Constantinople, et l'autre d'Athenes, tous deux grandement estimez pour leur bonne science.
Aristippus fut un Philosophe de Cyrene, cité de Libye, entre Egypte, et les Syrtes: Il fut auditeur de Socrates, et voulut ainsi comme Epicure maintenir que le souverain bien consiste en seule volupté. On le surnomma chien de Roy: pource que desirant satisfaire à son ventre, comme les bestes brutes, il flattoit Denys le tyrant de Sicile, qui a ceste cause luy faisoit faveur et bonne chere.
Aristoxenus fut Medecin, et Philosophe de Tarente, auditeur d'Aristote, {d Aristote} auquel en mourant il dict villenie, à raison qu'il avoit preferé à luy Theophaste son autre disciple, pour estre successeur en ses lectures. Cest Aristoxenus a escrit des livres en toutes sciences: mais principalement en Musique, et disoit entre autres choses que l'Ame {l Ame} n'est sinon harmonie.
Arithmetique est la science de compter et nombrer.
Armilles sont comme gros anneaux qui se mettent pour ornement à l'entour des bras, dont ilz sont communement dictz bracelletz.
Artimon signifie un petit voyle de Navire, que l'on dict autrement Trinquet.
As estoit antiquement un pois de douze onces.
Asphaltes est un lac au dessoubz de Babilone, que plusieurs estiment estre la Mer morte.
Astragale est un membre rond en massonnerie, que l'on dict autrement fuzée avec ses pezons.
Astres sont estoilles au ciel.
Attaliques, furent les Roys d'Asie qui descendirent de la lignée d'Attalus.
Athenes fut une cité de Grece noble et grandement renommée, entre les pays d'Achaie, et Macedoine, premierement edifiée par Cecrops. Tous les bons artz et sciences industrieuses furent inventées en ceste la: qui fut aussi mere et norrice de plusieurs excellens Philosophes, Orateurs, et Poëtes, qui par leurs oeuvres ont acquis grande louenge durable à perpetuité.
Athos est une montaigne entre Macedoine et Thrace, l'une des plus haultes du monde: mais le grand Roy Xerses seulement pour monstrer sa puissance la feit trencher en deux parties, et passa la mer à travers.
Atomes sont ces petites choses qui ne se peuvent diviser, lesquelles on veoit volletter aux rayons du Soleil.
Atlas fut un souverain astrologue, et celluy qui premierement enseigna les cours du Soleil, et des estoilles. Aucunesfois aussi Atlas se prend pour une montaigne en Africque, si haulte que son coupeau semble toucher au ciel.
Athletes estoient ceulx qui s'exercitoient à la lutte et autres forces corporelles: et aucunesfois ilz se mettent pour gens qui disputent l'un contre l'autre, ou font à l'envy des exercices d'esprit.
Atrament est la couleur que l'on dict noire, ou brune.
Atrium est un avant logis: mais aucunesfois il se prend pour toute l'habitation, ou pour le principal membre d'icelle.
Automates sont choses qui se meuvent par elles mesmes.
Avaton signifie {signie} un avant mur, ou lieu dont l'on n'a congnoissance: aucunesfois aussi on le prend pour un desert, et place ruynée, ou bien inaccessible: c'est à dire à laquelle on ne peult aller.

B

Babilone est la ville principale du royaume ou premierement regna Nembroth le geant, au temps duquel encores n'estoit elle fermée de {du} murailles: mais Ninus son successeur commencea de la faire clorre, et Semiramis la Royne l'acheva, elle est assise en une grande plaine merveilleusement delectable pour la nature du lieu: sa ceincture de muraille est toute quarrée, et si à cinquante coudées de large, avec quatre foys autant de hault, mesmes est toute faicte de brique massonnée de cyment liquide, autour de laquelle y a cent portes fermées de grosses lames d'arain, et le fleuve dict Euphrates passe à travers la ville, on l'appelle aujourdhuy le grand Caire, et est soubz la seigneurie du Turc.
Baleaires sont deux isles en la mer d'Espagne, maintenant dictes Majorque et Minorque, dont les habitans souloient vivre sauvagement, et aller nudz, ils s'exercitoient pour le plus à getter pierres à la fonde, et n'eussent ozé leurs enfans menger un seul morceau de viande, si premierement ilz ne l'eussent à coups de pierre abbatue de dessus un pillier ou elle avoit esté mise expres. Ces isles eurent jadis en elles si grand nombre de Connilz, que les habitans furent contrainctz de supplier le Monarque Auguste que son bon plaisir feust leur envoyer secours de gens pour les desanger et destruyre.
Baingz sont propres a laver les corps des personnes, il en est en plusieurs lieux qui sont naturellement tiedes, mais les particularitez seroient trop longues à reciter.
Banausos est un mot Grec signifiant tout artisan qui besongne par feu.
Barice est toute chose de grande resonance.
Baricephale est aussi un grand temple, ou autre edifice dedans lequel la voix resonne fort à cause des voultes.
Basilique signifie un pallays royal, ou bien le lieu ou les Senateurs et magistratz rendent ordinairement le droict au peuple.
Berose fut un Chaldéen, tresexpert astrologue, auquel les Atheniens feirent dresser une statue ayant la langue d'or.
Bizance fut une cité fort antique, laquelle aujourdhuy se nomme Constantinople.
Beotie est une region de Grece laquelle regarde trois Mers, assavoir celle de Pelloponesse, de Sicile, et l'Adriatique ou Venitienne.
Boreas ou Aquilo est un vent qui vient d'entre Septentrion et Orient, apportant la gellee, il est froid, sec, et sans pluye, nous le disons communement {commnnement} la bize.
Borysthenes est un fleuve d'Asie passant à travers la Scytie.
Brume est le temps des plus courtz jours de l'année, ausquelz se faict le Solstice d'yver, c'est à dire quand le Soleil est au plus bas qu'il sauroit estre, et commence à remonter.
Buccule est une petite couverture comme d'une layette, faicte pour ouvrir et fermer au besoing.

C

Chambres sont proprement lieux faictz en voulte, aussi le mot vient de cambrer qui signifie autrement courber, mais nous en abuzons en nostre langage, et les mettons pour estages dont les planchers sont platz et uniz.
Camene estoit une fontaine à Rome, dont l'eaue estoit singuliere pour ceulx qui desiroient bien chanter, et avoir bonne voix.
Camille estoit un vaisseau couvert, dedans lequel se gardoient tous les utensilles d'une espousée.
Canopus est une estoille pres du Pole antarctique, et qui ne se veoit sinon par ceulx qui naviguent devers Taprobane.
Canon musical est le sommier sur lequel se font les conduictz ou postes qui portent le vent depuis un tuyau d'orgue jusques a l'autre, aussi loing que lon veult, pour faire une doulce resonance.
Capitole souloit antiquement estre le chasteau ou fortresse de la ville de Rome.
Capricorne est l'un des douze signes du ciel, ou le Soleil se treuve {treuué} au moys de Decembre.
Chevreaux sont pareillement signes au ciel.
Carcois signifie le hault bout du mast d'un Navire, ou il y à certains poullions propres à tirer la corde attachée à la vergue sur quoy le voyle est estendu.
Caria est un pays d'Asie la mineur, qu'on dict maintenant la Morée, ou regna le Roy Mausolus mary d'Artemisia, qui donna le nom à l'herbe dicte Armoyse.
Cartage fut une cité antique d'Afrique, tant renommée que Saluste dict qu'il vault mieulx s'en taire que d'en dire peu.
Cartibe est une table de pierre equarrie, mais aucunement plus longue que large.
Cassiopea est un signe au ciel.
Chastrer les arbres, est les percer par le pied, afin d'en faire sortir la mauvaise humeur qui est en leur tige, et qui corrompt la bonne seve.
Catapulte est une grand machine de guerre qui est assez exposée dedans le texte, elle n'est maintenant plus en usage.
Cataracte est une ouverture entre des montaignes, par ou quelque cours d'eaue se gette de hault en bas, et faict merveilleusement grand bruyt.
Catatechnos signifie un ouvrier besongnant de grant art.
Caucase est une grande montaigne qui separe le pays d'Inde d'avec la Scythie.
Causis signifie brulure, ou coterization.
Caecias est un vent qui soufle de tele sorte qu'il ne chasse point les nuées, mais les attire. Il est situé entre Aquilon et l'Orient equinoctial.
Cedre est un arbre que Vitruve descrit assez au penultime chapitre de son deuxieme livre.
Centre est le point qui se faict d'une des jambes du Compas pour tourner un Rond si grant ou si petit que l'on le veult.
Centaure est un signe au ciel que nous appellons Sagittaire, par ou le Soleil passe au moys de Novembre.
Cephisus et Melas sont deux rivieres au pays de Beotie, dont la premiere sourt au pied du mont Parnassus, et puis s'en va tumber en la mer dicte Phalere. La seconde pareillement sort de la mesme montaigne, et se rend navigable des sa source, {soutce} son eaue va cheoir dedans icelluy Cephisus.
Ceres fut fille de Saturne et d'Opis, c'est à dire du Temps et de la Terre, elle est dicte déesse des fromentz, pource que ce fut la premiere qui en monstra l'usage aux hommes, voyez qu'en dict Cicero en son livre de la nature des Dieux, et Claudian le Poëte en son ravissement de Proserpine.
Cerulée est la couleur qu'on dict Azur.
Ceruse est une drogue que nous appellons communement blanc de plomb ou blanc d'Espagne.
Cerre est une espece d'arbre qui croist droict et hault, et qui est de forte matiere, nous l'appellons communement Hestré.
Chelonies sont Ammares, Auches, ou boystes sur quoy s'assiet un moulinet qui se tourne à bras, pour faire monter un fardeau ou lon veult.
Chirotonecton estoit le tiltre d'un livre que Democrite le philosophe avoit faict pour soymesme, et signifie autant comme Recueuil des choses elues, et quasi triées à la main.
Chionides fut un Athenien Poete, facteur de Comedies ou jeux pour donner plaisir au peuple.
Chio est une petite isle de la mer Mediterrane, maintenant dicte Sio subjecte aux Genevoys, et produit d'excellent vin.
Chorobate est un instrument propre à niveller eau.
Chrisocolle est une couleur provenante d'un humeur qui naist dedans les puys, et aux minieres des metaulx: elle participe aucunesfois du Verd, aucunesfois de l'Azur, aucunesfois du Rouge, et aucunesfois du Jaune, qui est la plus grande perfection quelle sauroit avoir en beauté.
Chroma est un temps de Musique, fleurette de plusieurs semybreves, qui ne durent plus à estre prononcées que faict une notte de plain chant.
Cicloten en Grec signifie mouvement de poullions ou Rouages.
Cidnus est un Fleuve, qui sort de la montaigne Taurus et passe à travers la ville de Tarso en Cilicie.
Cylindre est une piece de boys ronde, ayant deux Rouleaux en ces extremitez, cestela en pays plat s'attache par double corde au collier d'un cheval ou autre beste de labeur, et en applanie l'on les terres, apres qu'elles ont esté labourées. Noz Champenois l'appellent communement Bloutroër, pource qu'il casse et met à l'uny les mottes de terre qu'ilz nomment Bloutres ou Blottes.
Cimaises sont moulures que noz ouvriers {ouurierss} disent communement doulcines.
Cimbales sont clochettes assez congneues aux fondeurs: parquoy je ne m'arresteray à les descrire.
Cinosure est une estoille au Ciel.
Cirque de Flaminius, c'est celluy que Cesar feit refaire.
Climatz sont amples espaces de la Terre ou du ciel, que l'on peult dire bandes ou lizieres.
Climaciclos est une petite eschelle ou bandage d'une machine de guerre, pour la mettre en devoir de jetter traict à l'ayse des tireurs, en la montant à reposées.
Clitore est une ville d'Arcadie, assez specifiée au texte.
Colchos est une province en Asie, voysine du pays de Pont, en elle est contenue la montaigne de Caucase qui s'estend jusques aux montaignes Riphées, d'un de ses costez elle regarde la Mer Euxine, et les paluz Meotides: et de l'autre la Mer Caspiane ou Hircanienne, le fleuve Phasis la baigne de ses undes. Ceste province fut au temps passé le royaume d'Aetes pere de Medée, et ou l'on faint que Jason ravit la toyson d'Or.
Colosicoteres sont choses plus grandes que le naturel.
Comices estoient les jours ausquelz tout le peuple de Rome s'assembloit afin de créer les magistratz.
Conclaves sont tous lieux qui se ferment à clef: mais aucuns veulent que ce soient les plus secrettes parties d'une maison.
Conistere estoit un lieu ou les jeunes hommes qui s'exercitoient nuz à la lutte, apres avoir huylé leurs corps, venoient à les frotter de pouldre, afin que leurs adversaires peussent avoir meilleure prise.
Conon estoit une forme d'Horloge.
Cos est une Isle des Cyclades en la Mer Egée selon aucuns, et selon d'autres en l'Icarienne, voysine de Rhodes, droit devant Carie. Elle fut au temps passé merveilleusement bien peuplée, et fort plaisante à la veue de ceulx qui naviguoient en cest mer. D'avantage elle produit du vin excellent, Hippocrates chef de la medecine, et Appelles singulier en paincture furent tous deux natifz de la.
Coracin est la couleur du plumage d'un corbeau.
Corbeau est un signe au ciel.
Corus ou Argestes, est un vent froid et humide, lequel toutesfois à peu de rigueur.
Crahtes est le nom d'un fleuve qui passe en Lucanie autrement la Prusse, au royaume de Naples, dont l'eaue à grande efficace pour secourir a plusieurs maladies, et si a d'advantage proprieté de faire devenir les cheveulx blondz aux personnes qui se baignent souvent en ses undes, et qui en lavent leurs testes, il en est aussi un autre en Achaie lequel a tout semblable nom.
Cresus fut filz d'Aliates Roy de Lidye qui devoit hommage à Cyrus monarque des Persans, mais il voulut mescongnoistre son seigneur, dont à la fin la juste punition s'en ensuyvit: car il fut pris en une bataille et mené à Cyrus qui le condamna d'estre bruslè, et comme il estoit sur le boys ou lon vouloit mettre le feu, le povre captif s'escria par trois fois, Solon, Solon, Solon, qui estoit un mot inaccoustumé à Cyrus, parquoy il desira savoir que c'estoit a dire, et à ceste fin le feit amener devant son siege Royal, ou il declara que c'estoit le nom d'un philosophe auquel une fois il avoit monstré ses grans tresors, et demandé s'il estimoit homme {hmome} au monde autant heureux que luy, à quoy luy fut promptement respondu, qu'il nestoit aucun perfettement heureux ce pendant quil vivoit en ce monde, et ceste chose entendue par Cyrus, qui eut peur de la muableté de Fortune, non seulement ne fut cause de respiter Cyrus de mort ains que son vainqueur luy feit de grans biens, et le retint dela en avant au conseil de ses plus particuliers affaires.
Crete est une isle de Grece, maintenant dicte Candie, et est soubz la seigneurie des Venitiens.
Criodoce est le fust armé d'une teste de bellier dont lon souloit par assaulx demollir les murailles des villes ou fortresses ennemyes.
Ctesiphon fut un Architecte qui edifia le temple de Diane en Ephese, estimé l'un dés sept miracles du monde, avant qu'il feust bruslé par Herostrate, lequel seulement desiroit à faire parler de soy.
Cube est assez exposé dedans le texte, parquoy icy n'en feray autre mention.
Cuma fut jadis une cité pres de Baye au royaume de Naples, et de la fut la Sibile Cumaine, tant celebrée par virgile.
Cypres est un arbre assez congneu en plusieurs endroictz: mais qui vouldra veoir sa nature, lise le trente troisieme chapitre du sezieme livre de Pline.

D

Darius fut un Roy de Perse, trois fois surmonté en bataille par Alexandre le grand, et à la troisieme ainsi comme il se vouloit sauver par fuytte, lon dict qu'il fut tué de ses propres soldatz.
Decastile vault autant à dire comme un lieu orne de dix colonnes.
Decussation est ce que noz ouvriers communement appellent traict quarré.
Daulphin est un signe au Ciel.
Delos est une isle au mylieu des Cyclades en la mer Ionique, et est fort renommée pource que les poetes antiques disent qu'Appollo et Dyane ilz prindrent leur naissance.
Demetrius fut un roy de Macedoine surnommé polliorcetes, c'est a dire ruyneur de villes, plus renommé apres Alexandre le grand qu'autre qui ait regné en ceste province la.
Democrite fut imitateur de Pythagoras, mais non pas auditeur, il estoit de si riche maison que son pere logea quelque fois le grand Roy Xerses, et a ses propres despens le traicta magnifiquement avec son armée, qui estoit d'un million d'hommes et plus, a ce que disent les escrivains, toutesfois ce Democrite ayant deux freres plus aagez que luy, voulut avoir sa legitime dont il consuma beaucoup a voyager, premierement en Egypte ou il voulut apprendre l'art de Geometrie des prestres Egyptiens puis en Chaldée, et aux Gymnosophistes en Inde, finablement il s'en révint en Athenes, ou il se moquoit de tout ce que faisoient les hommes, et ryoit ordinairement. Apres luy mesme se creva les yeulx afin qu'il peust mieulx à son ayse penser aux secretz de Nature, il vescut Cent neuf ans, et puis mourut.
Dentilles ou dentelures sont termes assez usitez entre les ouvriers.
Desert c'est un lieu inhabité, ou inhabitable.
Diagramma, est un pourtraict ou figure de Geometrie, et si peult aussi quelquefois signifier l'escriture contenue en un livre.
Diastyle signifie un lieu enrichi d'un double reng de colonnes
Diathese est l'affection qu'un personnage peult avoir de parler, quand il à conceu en son courage quelque chose qui luy semble bonne a dire.
Diapenté est un accord de Musique, tant en voix que sur instrumens, les chantres le nomment communement une quinzieme.
Diatessaron est une quatorzieme qui n'est pas bon accord, mais elle passe si viste {visteń} qu'elle faict trouver les autres accordz beaucoup plus doulx qu'ilz ne sembleroient sans ceste dissonance.
Diatone vault autant a dire comme perfecte consonance de deux voix ou sons estant d'accord.
Diaulos est un cours double, asavoir depuis un lieu jusques a un autre, et le retour apres. Aussi est ce Diaulos une mesure contenant douze cens piedz de terre, qui valent deux stades, autrement la longueur de deux cens coudées.
Dicalces et tricalces, estoient antiquement petites pieces de monnoye que ne valoient que deux ou trois deniers.
Didoron signifie un pied en longueur, qui vault quatre palmes continuées, dont il en porte deux de large qui ne font sinon demy pied.
Dimoeron signifie douze.
Dinocrates fut un Architecte, maintenant plus renommé par la mention qu'en à faict cest autheur, que par le tesmoignage d'aucun autre: car Plutarque en son dernier livre de la fortune ou vertu d'Alexandre, dict que celluy qui voulut proposer a ce grand Roy de reduyre le mont Athos en figure d'homme, estoit nommé Stasicrates.
Diognetus fut aussi un autre Architecte assez fameux par le rapport de cest autheur.
Dioptre est un instrument propre à nyveller de l'eau.
Diplasion signifie une double en accord de musique
Dirrachio est une ville de Sicile qui fut antiquement nommée Epidamnus du nom d'un Roy barbare qui regnoit en celle Isle, mais les Romains voulans y mener une Colonie de leurs gens pour y demourer, l'aymerent mieulx nommer Dirrachio, du nom de Dirrachus filz de la fille de ce Roy, a raison qu'il y feit edifier le port: toutesfois {toufois} aucuns veulent dire que celle ville n'est pas en Sicile, mais en Esclavonie sur le bort de la Mer Adriatique, et qu'on la nomme maintenant Ragouze. Quoy qu'il en soit, cest le lieu ou Cicero eslisoit son Exil, quand la Monarchie des Romains estoit troublée par le Triunvirat, {Truinuirat} ou tyrannie de trois hommes, a savoir Marc Anthoine, Octavian Auguste, et Lepidus, successeurs de Cesar.
Diris est une montaigne en Mauritanie, laquelle a cause de sa grande haulteur estoit estimée Colonne supportant {snpportant} le Ciel, mais maintenant on la nomme Atlas.
Discipline est differente a la science, car Discipline est ce qui s'apprend par doctrine et enseignement des maistres, mais science est la chose que l'homme comprend de soymesme, par le moyen de sa raison.
Disposition est une bonne et convenable situation des choses.
Displuviez sont lieux a descouvert qui peuvent par tous endroictz recevoir la pluye en leur pourpris.
Dorique en cest Autheur est une facon de bastir, laquelle estoit antiquement propre à un peuple de Grece appellé Dorien, qui habitoit en une partie d'Achaie, {Aachaie} assez pres d'Athenes.
Doron à esté assez exposé cy dessus, au mot de Didoron.
Drachme se prend aucunesfois pour une mesure, et aucunesfois pour un pois.
Dryades sont Nymphes des boys ainsi nommées de Drys parolle Grecque, laquelle antiquement signifioit toute espece d'arbre: mais depuis les Grecz n'en ont usé que pour signifier un Chesne.

E.

Echeia est un retentissement de parolles, ou pour le moins redoublement des dernieres syllabes, quand l'on parle ou chante hault, en lieux qui font tel effect de leur nature.
Ecclesiasterion vault autant a dire comme lieu ou les hommes s'assemblent pour veoir quelque chose.
Ecphores sont saillies de moulures, et d'autres choses en edifices.
Edilité au temps des Romains estoit l'office ou magistrat ayant charge de prendre garde aux bastimens de la ville, tant particuliers que publiques, et visiter s'ilz estoient bons ou mauvais, afin qu'il n'en advint aucun inconvenient au peuple. Aujourdhuy cela se faict par Voyers a ce deputez, et par maistres Massons et Charpentiers commiz a cest affaire.
Effecton signifie oultre six, ou autant qu'un sixieme et demy.
Egypte est une region d'Asie, par ou passe le fleuve du Nil, tant renommé. Ceste la se vante d'avoir esté habitée d'hommes plus tost que nulle des autres terres, et que les peuples qu'elle a nourriz ont inventé plusieurs bonnes sciences, comme la saincte Theologie, et la calculation des estoilles. Aussi (à dire la verité) Dedalus, Melampus, Pithagoras, Homere, Solon, Museus, Platon, Democrite, Apollonius, Thyaneus, et plusieurs autres memorables personnages antiques, y ont esté apprendre les sciences, dont ilz ont depuis ennobly leurs contrées.
Eleothesium ou plus tost Eleodeusium estoit un lieu ou les antiques voulans lutter nudz, se frottoient les corps d'huyle, meslé avec de la Cire fondue.
Emplecton signifie bonne lyaison de massonnerie.
Engonatum estoit un instrument qui avoit la forme d'un genouil ployé, et servoit a congnoistre les heures.
Engibates ou Anchibates sont ja exposez en la lettre A.
Ennius fut un Poëte antique Latin, qu'aucuns disent avoir esté né a Rudis cité fort ancienne au pays de Calabre, et les autres veulent qu'il soit de Tarente, laquelle est au mesme pays. Quoy qu'il en soit ce Poëte fut amené a Rome par Caton le Questeur, c'est adire lieutenant ou chef en l'armée des Romains, ou bien Tresorier general ayant charge de faire apporter les deniers communs a l'Espargne, sa demeure estoit au mont Aventin, ou il se contenta du service d'une seule chambriere: toutesfois il avoit grande familiarité avec Scipion l'Affrican, et luy faisoit ordinairement compaignée a la guerre, qui faict dire a plusieurs qu'apres sa mort, son corps fut enterre au sepulchre des Scipions. L'on dict que le susdict Caton estant desja en grande vieillesse, voulut apprendre les lettres Grecques de cest Ennius, duquel aussi Virgille a pris beaucoup de bonnes choses comme il à confessé souventesfois, disant a ses amys qu'il grattoit de l'or dedans le fumier d'Ennius.
Entasis signifie tumeur ou enflure au corps d'une creature, mais cest autheur en use pour le renflement des colonnes.
Eolipiles sont boules creuses propres a soufler feu.
Epagon est une tierce mouffle attachée au pied d'un engin, a ce que les manouvriers enlievent plus facilement un fardeau.
Ephese souloit estre une grande ville d'Asie fort renommée, singulierement pour un temple consacré a Diane, lequel estoit nombré entre les sept miracles du monde, aussi demeura il Deux cens vingt ains a estre basty, et dedans ce temps fut enrichy de Cent vingt sept colonnes, chacune portant Soixante piedz de haulteur, et faicte pour le plaisir d'un Roy, mais entre autres il y en eut Trente six entaillées d'un excellent et tresindustrieux artifice.
Ephebeum estoit un lieu expressement ordonné pour y faire exerciter les jeunes gens.
Epibathra est proprement l'eschelle par ou lon monte de l'Esquif au Navire.
Epicure Athenien auditeur de Xenocrates, commenca de philosopher en l'aage de Quatorze ans, il ne mettoit, quoy qu'on {qu on} en vueille dire, le souverain bien en volupté du corps comme faisoit Aristippus, mais le constituoit en privation de douleur, que Cicero nomme indolence. Ledict Philosophe n'estima oncques la Dialectique, ou art de disputer, ains disoit que la Philosophie se peult assez comprendre par simples et communes paroles, pourveu qu'elles ayent force et proprieté de signifier les choses dont lon entend parler. Sa fantasie fut qu'il n'est point de Dieux de providence, ny d'industrie en la vie humaine, {hnmaine} par laquele aucune personne se puisse advancer oultre sa destinée. Il ne voulut en toute sa vie faire sinon un seul amy familier qui se nommoit Metrodore de Lampsace, {L'ampsace} mais aussi l'ayma il perfectement.
Epistomium est la clef ou tourillon d'une fontaine mise a un vaisseau, et laquelle ouvre ou serre la voye a la liqueur contenue dedans, ainsi qu'il plaist a celluy qui la manie.
Epistyles sont Architraves que j'ay desja specifiez en la lettre A.
Epitritos en Grec signifie aux Latins une sesquitierce, et a nous une tierce et demye.
Epitoxis est la noix d'une Arbaleste, ou la corde se vient abender.
Episigis est la chambrete ou mortaise en quoy ou met ladicte noix.
Equicoles sont peuples assez exprimez dedans le texte.
Eratosthenes fut un philosophe de Cyrene cité de Lybie entre Egypte et les Sirtes, il fut disciple d'Ariston Chionien, et de Callimachus le Poëte, mais il se trouva si bien garny de bonnes sciences que plusieurs le nommerent le petit Platon, ce fut ung excellent Cosmographe, c'est adire escrivain ou painctre de toute la machine du monde, ou il vescut Quatre vingtz et un an, puis paya le tribut de nature.
Erythrée est selon aucuns une espece de terre qui se dict fleur de pierre, ou terre sigillee, d'autres estiment que c'est une sorte d'Alun, comme de Roche, quelzques uns croient que ce soit comme vitriol Romain, et certains autres la cuydent fleur de farine de froment brulée, mais à la verite c'est terre comme lye de vin vermeil, ou comme cendre faicte d'une herbe qui s'apporte du pays de Levant, laquelle cendre aucuns nomment Alum de Catine.
Ergata est l'engin que noz ouvriers nomment un Cinge, avec lequel on descharge les bateaux remplis de choses si pesantes, que mains d'hommes n'y sauroient donner ordre.
Eridan est un signe au Ciel, et en terre le fleuve d'Italie ordinairement nommé le Pau.
Eschilus, il à esté deux hommes de ce nom, dont l'un fut d'Athenes: et l'autre Poëte de Thrace.
Eschara signifie un gril a rostir, et pource qu'une base ou entablement d'aix clouez sur Lambourdes ou pieces de charpenterie, se faict a la semblance d'icelluy gril. on la nomme entre les Grecz eschara.
Escueuil est un arbre de l'espece de Chesne, portant du glan bon a manger, dont les premiers hommes prenoient leur nourriture, avant que les grains feussent en usage.
Ethna maintenant Mongibel, est une montaigne en Sicile, qui souloit continuellement bruller, et jetter flambes et flammeches par hault, toutesfois son pied à tousjours esté verd, et merveilleusement delectable, mais depuis quelzques années lon dict que le feu s'en est estainct Les Poëtes faignent que Jupiter y fouldroya certains Geans.
Ethrurie est le pays de la Tuscane, maintenant des Florentins.
Evangelos signifie bon messager.
Eudoxus fut le nom du filz d'Eschines de Candie, il estoit en son temps grand Geometrien, singulier Astrologue, et Medecin excellent, aussi fut il auditeur {auditur} de Socrates, et le premier qui ordonna les années, cest homme de bon jugement se mocquoit des Chaldéens qui predisoient bonne ou mauvaise fortune aux creatures humaines suyvant l'influence du ciel au jour de leur nativité. Si est ce qu'il y à encores eu un autre Eudoxus Rhodien lequel à escrit des histoires, et aussi portoit ce mesme nom, un Poëte comique de Sicile, qui suyvoit Agothocles le Tyrant.
Euphrates nommé Almachar en la langue des Assiriens est un fleuve d'Asie qui passe a travers la ville de Babilone, maintenant le grand Caire, il rend la Mesopotamie fertile, et qui en vouldra veoir d'avantage, lise le vingt et quatrieme chapitre du cinquieme livre de Pline, Pomponius mela en son troisieme livre, et Solon au cinquieme chapitre de son oeuvre.
Europe est l'une des trois parties du monde, son commencement est audeca du fleuve Tanais, ou a la mer dicte Hellesponte, et safin aux Gades ou destroict de Gibraltar, Pline l'appelle nourrice du peuple dominateur de toutes nations, et dict Herodote en son quatrieme livre que c'est la plus belle partie de la terre, mais qu'il n'y à vivant lequel puisse dire a la verité d'ou ce nom luy est venu: Toutesfois l'oppinion commune est que ce fut d'une Europa fille d'Agenor Roy de Phenicie, laquelle Jupiter transformé en Beuf ravit, et la mena en Crete ou elle enfanta de luy Minos, Rhadamanthus, et Sarpedon.
Eurus est un vent chault et humide.
Eustyle c'est un lieu bien et convenablement garny de colonnes.
Exastyle c'est adire ou il y à six colonnes.
Exaphores sont sixgaignedeniers qui portent un fardeau ensemble.
Exedres sont lieux garniz de sieges ou les hommes se peuvent retirer pour parler de leurs affaires, et pour ceste raison je les nomme dedans le texte parloers, a la mode usitée entre les marchans, specialement practiquans en la ville d'Anvers, et autres ou s'exerce grande trafficque de marchandise.

F.

Femur en Latin, et en Grec Meros, signifie a nous ce que les ouvriers appellent une Areste.
Flora dicte par les Grecz Chloris, fut une Romaine, fille de joye, qui par s'abandonner a plusieurs hommes, acquesta des richesses innumerables, dont a sa mort elle institua le peuple de Rome heritier, soubz condition toutesfois que par chacun an du {duń} temps avenir, on feroit certains jeux au jour de sa nativité, afin de perpetuer sa memoire. Mais depuis le Senat voyant que la cause de ces jeux estoit peu honneste pour leur donner meilleure couverture, feit entendre au peuple qu'elle estoit déesse des fleurs, et qu'il la failloit honnorer de sacrifices, afin que les fleurs et tous fruictz de la terre eussent moyen de prosperer.
Femorales sont les dedans des cuysses qui arrivent jusques aux aynes.
Fontaine du Soleil, ceste la est au pays des Troglodites, et l'appellent ses voysins communement doulce, a raison que sur le Mydi elle est d'une saveur bien plaisante a boyre, et froide le possible, mais quand ce vient sur la Mynuyt, elle s'eschauffe a merveilles, et devient tresamere.
Frize est une platte bande entre l'Architrave et la Cornice, en laquelle s'entaillent aucunesfois des fueillages, ou autres belles fantasies de demy bosse, afin d'enrichir et bien esgayer la besongne.

G.

Ganges, dict par les Grecz Physon est le plus grand fleuve qui soit en Inde: car il environne tout le pays, et à sa gravelle bien garnie de petites papillotes d'or, Quelzques uns veulent dire que sa source en est Paradis terrestre, mais d'autres maintiennent qu'elle se treuve en la Scytie, et que son cours passe par le mylieu de ladicte Inde, la divisant en deux moytiez, Le plus estroit de ce fleuve est de huict mille pas, et la plus grande largeur qu'il ayt s'estend jusques a vingt mille, mais sa moindre profondeur est de cent piedz de mesure.
Gades sont deux isles situées au destroit de mer qui separe l'Afrique de l'Europe, et se nomment l'une Abila, et l'autre Calpe. Aucuns tiennent qu'en la moindre des deux qui est prochaine de l'Europe, y avoit antiquement un temple dedié au grand Hercules, et que la estoient ses colonnes d'Arain, portantes huict coudées de haulteur, chose qui à faict dire ce regort de mer les colonnes d'Hercules: mais maintenant les mariniers l'appellent le destroit de Gilbraltar.
Genethliologie est une science faulse et abusive, qui promet de dire les choses advenir a toutes personnes, par la destinée que chacun apporte quant et soy au poinct de sa nativité, noz Astrologues judiciaires nomment cest acte la faire une revolution.
Gerusie est un lieu ou les sages vieillartz se retirent pour consulter ensemble de quelque affaire.
Gymnases estoient jadis places basties expres pour y faire habiliter la jeunesse en toutes manieres d'exercices, tant de l'esprit comme du corps.
Gyneconitis est une partie de maison ou seulement les femmes se retirent, et n'est loysible aux hommes d'y entrer.
Gnomonique, est une raison reguliere qui se fonde sur les ayguilles des Quadrans, pour faire veoir au moyen de leurs umbres quele heure il peult estre du jour.
Gonarche estoit un instrument en forme de genouil {genoiul} ployé, qui faisoit semblable effect de monstrer les heures.

H.

Harmonie est un esprit aucunement celeste et elementaire, qui se peult dire commun a tout le monde, a raison que par quantitez nombrables il esmeut et dispose toutes choses a concordances. Sainct Augustin la diffinit ainsi, Harmonie est un accord de voix differentes, comme haultes, basses, moyennes, et autres que lon appelle contres, lesquelles ne servent que de rendre la melodie plus perfecte.
Helepolie est une grande machine de guerre, que noz predecesseurs souloient nommer Bastille, faicte comme un fort de gros merrien, pour batre par dessus la muraille d'une ville, et desloger les Soldatz de leurs deffences, afin de donner moyen aux pionniers du party assaillant de sapper ladicte muraille.
Helice est l'estoille que lon appelle communement l'Ourse, pour autant que la fiction de poëtes veult que la fille du Roy Lycaon Calistho l'une des nymphes de Dyane déesse de la chasse, et de chasteté fut engrossée par Jupiter, et comme la déesse se baignoit en une fontaine avec ses nymphes, elle apperceut le gros ventre de Calistho parquoy son plaisir fut la transformer en Ourse, et pareillement le fruict de son corps: mais Jupiter en prenant compassion, colloca au ciel la mere et son enfant, qu'il convertit en estoilles, que lon dict la grande Ourse, et la petite.
Hemiolios est un nombre contenant en sa plus grande moytié toute sa moindre partie, et encores une demye d'avantage, les Latins disent cela Sesqui.
Hemisphere vault autant a dire comme demye rondeur, antiquement c'estoit un horloge creux comme un bassin, et encores n'en est pas la mode perdue: car il s'en treuve de telz en plusieurs endroictz, et la plus belle sorte que j'en veisse oncques, est en un village nommé Chelsé pres Londres, en la maison de maistre Mor, qui fut Chancellier d'Angleterre.
Hemycicle, ne signifie autre chose que demy cercle.
Heraclea fut une ville de Bythinie, fort renommée acause des colonies que sortirent d'elle pour aller habiter en autres pays, ceste la selon Strabo, demoura longuement en la subjection des Tyrans, mais a la fin elle en fut delivrée. Il y en avoit une autre de mesme nom, en Italie pres Cortone, Plus une autre en Sicile, entre les montaignes. Pachin et Lilibée, une autre au royaume de Pont en Asie, une autre sur l'extremité de l'Europe, et s'appelle maintenant Calpé, dont il à esté parlé soubz le mot de Gades, en ceste la souloit avoir un bel Amphiteatre, de si grand artifice qu'on le comptoit pour l'un des sept miracles du monde, il en estoit aussi une autre assise au pied du mont Oeta, entre Thessalie, et Macédoine, ou Hercules converty en fureur se brusla, une autre sur la bouche du Rosne, et encores un autre en la Campagne de Naples.
Heraclite fut un philosophe de Perse qu'aucuns veulent dire n'avoir jamais eu de precepteur, ains qu'il apprint de soymesme, aydé seulement de sa nature, et d'une extreme diligence: toutesfois quelzques autres afferment qu'il fut auditeur de Xenocrates, et d'un Hippasus Pythagoriste, il florissoit au temps du dernier Darius, sur la fin de ses jours, il devint hydropique, et ne voulut aucunement croire le conseil des Medecins, pour se guarir, mais suyvant sa fantasie, se feit frotter tout le corps de suif de beuf, puis s'endormit au soleil, ou les chiens le mangerent. C'est cestuy la que lon dict qui pleuroit ordinairement les miseres des hommes, au contraire de Democrite qui se rioit de leurs follies.
Hermidone sont les delices de Mercure.
Hermodius, par ce nom fut aucunesfois appellé le dieu Mercure.
Hidrauliques, sont machines mouvantes et resonantes par le moyen du cours de l'eau.
Hypate c'est une voix ou un son grave.
Hierapoli est une cité en Sirie selon Ptolemée en son cinquieme livre, Pline l'appelle Bambyce, et les Siriens en leur langage Magog, elle est assez prochaine de Laodicée, et d'une source d'eau chaulde qui faisoit facilement convertir en tuf la terre, qui en estoit arrosée. D'avantage il y souloit avoir en son domaine une autre eau de tele nature que les draps qui en estoient tainctz avec jus de quelques racines, se monstroient aussi beaux que ceux qui avoient passé par l'escarlate.
Hypate Hypaton, est la note que nous disons en la regle de la main. B. my.
Hypate meson, c'est Elamy.
Hypanis est un fleuve de Sarmatie, selon aucuns, et selon cest autheur il est en la region de pont en Asie.
Hypertirides sont fronteaux, claveaux, ou linteaux entre les ouvriers, mais au commun ilz s'appellent dessus de portes.
Hipetros signifie un lieu qui n'est point couvert par dessus, ains totallement exposé a l'air.
Hypocauste est un poile pour eschauffer une chambre ou une salle.
Hypotrachelio, c'est un petit membre rond avec son petit quarré contre le bout d'enhault d'une colonne, les ouvriers le nomment Gorgerin.
Hippopotames sont chevaulx aquatiques lesquelz principalement naissent dedans le fleuve du Nil, leurs deux piedz de devant sont onglez et fourchez comme ceulx d'un Beuf, ilz ont le crin et le dos comme un cheval, et si hannissent tout ainsi, leurs museaux sont camuz, et leurs dentz comme celles d'un Porc sanglier, mesmes ont la queue tout ainsi tortillée, voyez qu'en disent Pline au vingt {vignt} cinquieme chapitre de son huitieme livre, et Bude en ses Pandectes.
Hipomoclion c'est un billot que les ouvriers mettent devant quelque grosse pierre ou autre chose qu'ilz veulent mouvoir de lieu en autre, puis assieent dessus le dos de leurs pinses ou piedz de chevres, et mettent leurs bizeaux soubz le faix. Cela faict ilz foulent tant qu'ilz peuvent sur les queues ou boutz d'iceulx outilz, et par ce moyen soubzlevent ce qu'ilz veulent, mais à raison que ce petit billot est cause de faire desplacer une chose sans comparaison plus pesante qu'il n'est, les susdictz ouvriers luy ont donné le nom d'orgueil.
Homeromastix c'est a dire mesdisant d'Homere.

I.

Ichneumons sont bestes de la grandeur d'un Chat et de la forme d'un Rat, au moyen dequoy on les appelle Ratz d'Inde, ou Romadoux. J'en ay veu un vivant au seigneur Maximiliansforce. Ceste beste faict mourir les Crocodiles: car elle se faict une cotte de fange, et la laisse seicher afin de s'en servir d'armure, puis se lance dedans les ventres de ces grandes bestes, ou elle rompt et dessire leurs entrailles, apres s'en sort par l'ouverture d'icelluy ventre dont la peau n'est gueres dure, et pour ceste raison les Indiens adorent l'Ichneumon comme celluy qui destruict leurs plus mortelz ennemyz.
Ichnographie est assez exposée par l'autheur mesme, parquoy je n'en feray autre reditte.
Ictinus ou Ictin fut antiquement le nom d'un Architecte.
Idées sont imaginations que les hommes font en leurs pensées.
Imbecilles c'est a dire sans puissance.
Inde est une couleur azurée, et semblablement un grand fleuve en Asie, dont la contrée d'Inde prend son nom: toutesfois il est nommé Sandus, par les peuples habitans au long de ses rivages, Il recoit beaucoup de grosses rivieres en soy, comme Cophé, Acesine, et Hydaspes, desquelles Pline à suffisamment escrit au vingtieme chapitre de son sixieme livre.
Ionie d'ou est venue la sorte des bastimens Ioniques, est une province d'Asie la mineur, située entre Carie et Eolie, le premier qui luy donna le nom fut un capitaine Athenien appellé Ion filz de Xuth, dont cest autheur parle assez en son texte.
Joppe est une ville maritime du pays de Palestine, ou (selon aucuns) regna jadis Cepheus pere d'Andromeda, c'est la plus antique cité du monde, considerê qu'elle estoit edifiée des devant le deluge. Quelzques autres afferment que ceste Joppe n'est point au pays de Palestine, mais en Inde, quoy qu'il en soit, il ne se treuve aucun autheur qui ayt mieulx ny plus elegamment escrit sa situation qu'a faict Egesippus, en son troysieme {trosieme} livre de la guerre des Juifz: parquoy qui la vouldra veoir amplement se retire a cest autheur la.
Isis qui premierement portoit le nom de Io, fut fille d'Inachus. Ceste la en allant par pays, une fois estant arrivée sur la fin du Nil, fut par Jupiter son amy transformée en vache blanche, a raison dequoy les Egyptiens la souloient adorer pour Déesse.
Isthimiens sont jeux que Theseus institua jadis a l'envy {ennuy} de ceulx qu'Hercules avoit ordonnez en Olympe, les hommes victorieux en ceulx la estoient couronnez de rameaux de Pin.
Isodome est une espece de bastiment auquel toutes les couches de la massonnerie sont faictes d'une egale haulteur.
Isles ou maisons insulaires, sont celles a l'entour desquelles on peult tournoyer par quatre voyes, sans empeschement d'autre edifice.
Juno Déesse de l'air est interpretée aydante a toutes creatures, elle fut faincte seur et femme de Jupiter qui est le feu, pource que ces deux elemens conviennent ensemble. Voyez qu'il en est dict en la nature des Dieux escritte par Cicero.
Jupiter le grand dieu des Gentilz signifie autant comme pere aydant. Soubz ce nom est entendu le feu, pource qu'il n'y a chose qui tant norrisse que la chaleur. Voyez qu'en dict Cicero en son troysieme livre d'icelle nature des Dieux.

L.

Lacedemoniens estoient peuples habitans une partie de Peloponesse region de la Grece, elle fut premierement nommée Oebalia, puis apres Lacedemone, qui est assez renommée pour la belle Helene, laquelle y fut ravie par Paris, et pour autres infiniz hommes excellens en conduitte de guerre, mesmes plusieurs autres douez de singuliere felicité d'esprit. Voyez qu'en dict Plutarque en ses Apophtegmes ou breves sentences laconiques.
Laconique est un poële d'Estuves.
Lacotome est une couppure emportant une petite piece hors la rondeur d'un cercle, comme seroit la couronne d'un prestre si elle estoit taillée jusques au test: Car s'il advenoit ainsi, necessairement fauldroit qu'il demeurast certaine profondeur sur le tour de la teste, et l'eschantillon qui en seroit osté se pourroit appelle Lacotone.
Lacunaires sont planchers faictz en voulte, mais en ce livre ilz se prennent souventesfois pour planchers platz ou bien platz fons, c'est a dire dessoubz d'Architraves et de Frizes.
Lacunaire ou Plinthe, est aussi une forme d'Horloge faicte sur une tuyle ou pierre cuytte platte, aucunement plus longue que large.
Larice est une espece d'arbre assez donnée a congnoistre par le texte de cest Autheur.
Larignum estoit un chasteau ainsi nommé pour estre voysin des boys de Larice.
Lasser est le jus d'une herbe que les latins appellent l'Asserpitium, les Grecz Silphion. et nous suyvant les Arabes Benjouyn. Pline en son vingt deuxieme livre dict que ceste herbe est un des meilleurs dons que nous ayons eu de nature, a raison qu'elle et son jus entrent en plusieurs compositions, et l'herbe par soy ayde grandement a faire la digestion, par especial a vieilles gens, et proffite aux femmes en diverses medecines.
Lesbos est une Isle en la mer Egée, dedans laquelle souloit avoir une ville de ce mesme nom, qui estoit Metropolitaine autrement chef de toutes celles du pays de Troade, dont les plus memorables furent Mitilene, Pirra, Eressos, Antissa, et Methimna, son circuyt estoit d'unze cens pas geometriques. En ceste Isle nasquirent jadis Pittacus l'un des sept sages de Grece, Alceus, Sapho, et Theophraste le philosophe disciple d'Aristote.
Liber pater, est selon aucuns Bacchus, Toutesfois il a esté plusieurs hommes de ce nom: mais le plus renommé de tous fut celluy que l'on dict avoir esté engendré par Jupiter et Semelé: Il nasquit en Thebes au pays de Beotie, et fut appellé Liber de la liberté qu'il donna aux villes de son pays, ou pource que Bacchus autrement le Vin est dieu de liberté, d'autant qu'il delivre les pensées de toutes facheries et sollicitudes, mesmes les rent audacieuses et hardies a toutes entreprises, ou pource que ceulx qui en ont pris oultre devoir parlent plus librement que les autres. Aussi est le Soleil appellé Liber, a raison qu'il faict en liberté son cours a travers du Ciel.
Libonotus est un vent chauld et temperé.
Libra ou la Balance, est un des douze signes du cercle par ou passe le Soleil.
Lyon est semblablement un autre signe.
Lievre pareillement.
Libration et Nivellement cest tout un.
Lycanoshipaton est une voix ou notte que nous appellons D. Sol. Re.
Lycanos mezon. G. Sol. Re.
Lydie est une province d'Asie, a travers laquelle passe le fleuve Meander qui faict de merveilleux tournoymens, elle s'estend Jusques en Ionie, et du costé d'Orient se faict voysine a la Phrygie, mais en la partie du Septentrion elle rencontre la Mysie, et devers le Midy circuyt et environne le pays de Carie, en ceste region de Lydie, sont le Mont Tmolus, et le fleuve Pactolus, dont la gravelle est semée de pailletes d'or. Ces villes memorables furent Ephese, Colophon, Clasomene, et Phara.
Ligne scotique c'est a dire tenebreuse: car de ce mot Scotos qui vault autant comme obscur, prend son nom la maladie dicte par les Grecz Scotomia, qui signifie esblouyssement des yeulx.
Lire est un signe au Ciel.
Lysis en matiere de molures, est ce que noz ouvriers appellent une doulcine, et les Italiens goule droitte, ou goule renversée.
Logos opticos est en Grec, ce que nous disons propos de Perspective.
Logeion c'est un Poulpitre, ou Chaire comme pour un Prescheur, en quoy souloit antiquement un certain personnage deputé, donner a entendre au peuple quele estoit la matiere d'une Comedie, Tragedie, ou Satyre, quand on la vouloit jouer.
Loutron signifie un baing d'eau froide.
Loriques en cest Autheur sont croustes ou revestemens de murailles.
Luteum ou Lutea est selon aucuns l'herbe que nous appellons Pastel, mais selon les autres c'est Guesde.
Lucius Mummius, fut un Citoyen de Rome.

M.

Macedoine est une region d'Europe, entre Thrace et Thessalie, elle avoit du commencement bien petite estendue: mais par la valleur de ses Roys, speciallement de Philippe et de son filz Alexandre, avec l'industrie, de son peuple qui soubmit ses voysins a soy, elle s'aggrandit, en sorte, que Cent et cinquante nations, estoient subgettes a son obeissance.
Magnesie est une Province de Macedoine, annexée a Thessalie, et est distante d'Ephese par seze mille pas, les habitans d'icelle Magnesie souloient antiquement estre bons hommes d'armes a cheval: Il est aussi une Magnesie nombrée entre les bonnes villes d'Asie, et située sur le rivage du fleuve Meander. Aupres de ceste la Scipion l'Asiatique donna une merveilleuse route au Roy Antiochus, qui estoit ennemy des Romains.
Malonie est une espece de vin que l'on dict a ceste heure Malvoysie.
Mamertin estoit aussi un vin qui croissoit aupres d'une ville de la Campagne de Naples, lequel souloit estre estimé entre les meilleurs.
Manachos est un cercle au moyen duquel on congnoist non seulement les umbres equinoctiales d'Esté et d'Yver: mais aussi des autres saisons, et de ce cercle est diametre ce que dessus j'ay nommé lacotome.
Mars au temps de la gentilité estoit adoré pour Dieu des Batailles.
Martia estoit antiquement une fontaine que j'ay assez exposée avec le texte.
Marseille est une ville en Provence, ou elle eut sa premiere fondation au temps qu'Astiages regnoit sur les Macedoniens, Sedechias sur les Hebrieux, qui estoit environ la Quarente deuxieme Olympiade, Cinq cens treze ans avant l'incarnation de Jesus Christ, et Quatre cens quatre vingtz quatre ans apres la mort du Roy David. Vray est qu'elle fut une fois ruynée, mais certains hommes de Phocense fuyans la tyrannie de Cyrus, ou (selon aucuns) la malignité d'Harpalus son lieutenant, la redifierent. Cicero en son second livre des Offices dict tant de bien et de louenges de celle bonne ville que je remetz tous les lecteurs a luy.
Masinissa fut un Roy de Numidie en Afrique, lequel fut premierement ennemy des Romains, et puis devint leur bon amy, mesmes persevera en ceste amytié jusques a la fin de sa vie.
Mausolus fut un Roy de Carie pays d'Asie la mineur, entre Lycie et Ionie, de ce Roy Theopompus dict qu'il ne desista jamais par faulte d'argent a faire chose qu'il eust entreprise. Aussi estoit il Satrape, c'estadire gouverneur de la Grece: Il avoit une femme nommée Artemisia laquelle ayma tant son mary qu'apres sa mort elle print les cendres de son corps, pource que la coustume d'adonc portoit que les corps des trespassez estoient bruslez avec merveilleuses cerimonies, et les meit en un vaisseau parmy de l'eau infuse de plusieurs bonnes odeurs, puis les beut, ne voulant donner a son feu mary autre sepulture que dedans son propre corps, tant elle luy portoit vraye amytié et singuliere affection. Si est ce toutesfois quelle luy avoit faict commencer un sepulchre tel que je diray au prochain article suyvant.
Mausolée fut la sepulture du susdict Roy Mausolus, dont Pline au cinquieme chapitre de son Trente sixieme livre, dict que la Royne Artemisia pour le bastir, convint de pris avec Scopas, Briaxes, Timothée, et Leochares, ouvriers excellens et recommandables par dessus tous ceulx de leur Siecle, qui estoit en l'an deuxieme de la Centieme Olympiade, asavoir Sept cens vingt cinq ans avant la nativité de Jesus Christ. Ces Architectes donc feirent ce Mausolée plus long que large, car sur les costez regardans le Septentrion et le Midy, il luy donnerent Soixante trois piedz d'estendue, mais non tant aux frontz du devant et du derriere qui regardoient l'Orient, et l'Occident. Tout son circuyt estoit de Quatre cens unze piedz, et avoit Vingt cinq coudées en hauteur: Il fut enrichy de Trente six Colonnes excellentes pour leur admirable artifice. Scopas feit le coste d'Orient. Briaxes celluy de Septentrion. Thimothée celluy de Midy, et Leochares celluy d'Occident: mais avant que l'ouvrage feust achevé, la bonne Royne Artemisia mourut, ce nonobstant les maistres ne se departirent de leur entreprise, ains la continuerent, sachans bien qu'il en auroient honneur a tout jamais, et que plusieurs des successeurs poursuyvans les artz d'Architecture et Sculpture, en pourroient tirer beaucoup de bonnes choses (et a la verité) ilz ne furent deceuz de leur esperance: car encores jusques aujourdhuy, plusieurs s'esforcent de contrefaire les choses qui en sont venues. Quand ceulx la donques eurent tout achevé, il survint un cinquieme Architecte, lequel feit au dessus du comble une Pyramide egale en haulteur au bastiment subject a elle, et voulut que par Vingt et quatre degrez l'on peust monter a son coupeau tendant en poincte quarrée, et encores apres tout cela le chariot de Marbre que Pithis avoit faict fut mys et posé sur le hault, depuis lequel jusques au rez de chaussée il y eut par ce moyen Cent quarente piedz de mesure, et pource que je say que la figure de ceste Artemisia et de son Mausolée sera grandement agreable a plusieurs amateurs de choses antiques, Je prometz les leur faire veoir en la seconde Impression de ce livre, teles que je les ay trouvées en medalles faictes et forgées des le temps de ladicte Royne, ou pour le moins bien tost apres sa mort.
Maurusia est ce que nous disons maintenant le Royaume de Grenade en Espagne.
Masaca autrement Cesarée, est une cité de Capadoce, assize au pied du mont dict Argeus.
Mecaniques sont gens industrieux, et qui vivent de leur art.
Medulliens, c'est une nation de peuple habitante les Alpes ou montaignes d'Italie.
Megalographie est paincture qui represente des choses grandes, comme actes heroiques, {heoriques} ou de grans seigneurs, et choses semblables.
Melin est une coleur qu'aucuns veulent dire estre jaune, d'autres tiennent qu'elle est blanche, et quelzques uns afferment qu'elle est entre les deux.
Melas est un nom propre a plusieurs fleuves, car il y en a un en Mygdonie, l'autre en Asie la mineur, et cestuy la circuyt la ville dicte Smyrne, un autre navigable en Cilicie, et qui la separe de Paphlagonie, un autre en Thrace, un autre en Beotie, et sort de la montaigne Parnasse, mesmes a tous ses rivages couvers d'Oliviers: Parquoy les Poëtes veulent qu'il soit consacré a Minerve Déesse de science. Ledict fleuve est navigable depuis sa source, et environ le Solstice d'Esté il se desborde comme le Nil: toutesfois il n'en court ja plus loing que de coustume, ains tumbe en quelzques fosses, ou se gette en des lacz, telement qu'il en regorge certaine petite portion en Cephisus lequel est son voysin: Il y en a aussi un autre de ce mesme nom en Sicile, et de cestuy la parle Ovide au quatrieme livre de ses Fastes, quand il racompte le chemin que feit Ceres en cherchant sa fille Proserpine que Pluto luy avoit ravye.
Melampus fut filz d'Amythaon et de Dorippé, mesmes frere d'un nommé Biant. Ce nom qui signifie piedz noirs luy fut donné pource que sa mere, je ne say a quele occasion, le laissa des son enfance emmy quelque champ, ou elle couvrit tout son corps de quelzques choses, reservé les piedz, qui demourerent battuz et noirciz du Soleil. Ce Melampus fut un excellent divinateur, et garny de grande science, au moyen dequoy il guerit les filles de Pretus qui estoient devenues enragées, et les restitua en leur bon sens, puis en espousa l'une asavoir Iphianassa.
Mercure a l'interpreter selon le Latin vault autant a dire comme courant au mylieu des hommes: Il est Hermes entre les Grecz, qui signifie interprete ou truchement. Or n'est ce Mercure autre chose que la parole, au moyen de laquelle tous hommes peuvent traffiquer ensemble, et voyla pourquoy les antiques le feirent Dieu de Marchandise, et luy meirent des aelles a la teste et aux piedz, voulans donner a entendre que la parole se porte legierement en l'air: Plus ilz le feirent messagier, a raison que par la parole toutes pensées sont descouvertes. Qui vouldra veoir combien il en fut de memorables soubz ce nom, lise le troysieme livre de Cicero traictant de la nature des Dieux.
Meroé est une ville Metropolitaine {Metropolitanie} de la plus grande Isle que face le Nil, et si en y a bien Sept cens, comme tesmoigne Diodore Sicilien, en ses premier, et dixseptieme livres. Ceste Isle porte la forme d'un Bouclier, et si a bien trois mille stades en longueur, et mille en largeur, dont chacun stade vault Cent vingt cinq pas, ou Six cens vingt cinq piedz communs. Elle est garnie de minieres d'Or, d'Argent, d'Arain, et de Jaiz, mesmes de boys d'Ebene, et de plusieurs sortes de Pierrerie. Elle est distante par Cinq mille stades de la ville de Syene, dont cy apres sera parlé. Le Roy Cambyses ayant occupé toute l'Egypte donna le nom de sa seur a ceste Meroé, pource qu'en la menant par le pays, elle y mourut et y fut enterrée.
Methode est une brieve facon d'enseigner ou apprendre quelque chose au moyen de laquelle les hommes perviennent assez tost a leur desir.
Metopes sont espaces quarrez entre deux Solives.
Milete fut une ville de Carie en Asie, laquelle fut fondée par un Miletus filz d'Apollo, et d'Argea fille de Cleochus. D'autres disent qu'il ne fut engendré de cest Apollo, mais d'un Exantius filz de Micon, et encores d'autres afferment qu'il estoit filz de Sarpedon filz de Jupiter. Quoy qu'il en soit, Ce Miletus voulant chasser Minos ja de grand aage, hors son royaume de Crete, maintenant Candie, Jupiter luy donna teles affres qu'il s'enfuyt en l'Isle de Samos, et de la en Carie ou (comme dict est) il fonda une ville de son nom pour sa retraicte.
Milo de Cortone fut homme de si grande force qu'il couroit bien un stade entier sans reprendre son alleyne, combien qu'il portast un Beuf sur ses espaules, qu'a la fin de la course il assommoit d'un coup de poing, puis le mangeoit tout en un jour. S'il tenoit une pomme en sa main, homme vivant ne luy eust sceu arracher, et s'il avoit assiz son pied en quelque place, nul ne l'en pouvoit desmouvoir. Cestuy la se fiant en sa force admirable, veit une fois un arbre esclatté par le mylieu qui luy donna envie desprouver si avec ses deux mains seulement il en pourroit faire deux parties, et de faict il y essaya, mais quand il eut faict son effort, l'arbre se resserra de maniere qu'il ne peut oncques retirer ses mains, a l'occasion dequoy il demoura la tant qu'il y fut mangé des Loups.
Minerve autrement Pallas estoit par les antiques estimée Déesse de Science, voyez qu'en dict Cicero en son troysieme livre de la nature des Dieux.
Myron fut un sculpteur natif (selon aucuns) de Syracuse en Sicile, et selon d'autres, il nasquit en Athenes. Quoy qu'il en soit il se monstra excellent en son art, et entre autres choses il feit une jeune Genice, tele que plusieurs estimoient qu'elle feust vive.
Mysie est une region d'Hellespont, dont l'une des parties tient de l'Asie, et l'autre de l'Europe, joignant au fleuve Ister maintenant Danube. Aussi Ptolomée en faict deux regions, asavoir la haulte, et la basse, ou la grande, et la petite, et les situe toutes deux au dela de Bythinie, assez pres de la montaigne Ida. La haulte Mysie est aujourdhuy dicte Servie, et Roussie, qui comprend une portion de Hongrie, et la basse est partie de Thrace, et se nomme a present Boulgie, toutes les deux sont soubz la puissance du Turc.
Mithridates fut un Roy du pays de Pont en Asie, lequel avoit grande force de corps et de courage: Il savoit parler vingt et deux langages divers. Cestuy la durant que les Romains estoient en discort les uns contre les autres, chassa le Roy Nicomedes hors son pays de Bithynie, et Ariobarzanes, de Capadoce, mesmes occupa toute la Grece, et les Isles adjacentes, excepté seulement Rhodes, Il entretint la guerre Cinquante six ans contre les Romains, et en ces entrefaictes feit prisonniers. Q. Oppius leur Proconsul, et Aquileius leur Legat: Toutesfois il fut une fois vaincu par Lucullus aupres de Cizique, en maniere qu'il fut contrainct s'en fuyr et se retirer devers Tigranes Roy d'Armenie, apres il fut encores combatu par Sylla, et finablement surmonté par Pompée. Quoy voyant son filz Pharnaces, luy mesmes l'assiegea en un chasteau, et cela voyant le povre Roy tascha de se faire mourir par poyson, chose qui ne luy peut succeder obstant les grans remedes dont il avoit usé toute sa vie, et en avoit accoustumé sa nature, qui fut cause de luy faire appeller un soldat Francoys a ce qu'il le voulust tuer, mais ce soldat estonné de la presence de son seigneur, ne seut jamais avoir le cueur de ce faire: ains se print a trembler de frayeur. Quoy voyant ledict Roy reduit a lextremité de desespoir luy mesme print la main du soldat, et ayda courageusement a se meurdrir.
Monde, ce mot comprend en soy, le Ciel, la Terre, et toutes les choses qui naturellement y sont contenues.
Monades ce sont nombres simples, comme qui compteroit plusieurs fois un, sans dire deux, trois, quatre, et ainsi des autres.
Mutius Scevola fut un gentilhomme Romain, lequel au temps que Porsenna Roy des Etruriens, maintenant Tuscans ou Florentins, eut mis son siege devant Rome, afin de restituer le Roy Tarquin surnomme l'Orgueilleux en son authorité dont les Romains l'avoient desmis. Ce Mutius alla de faict a pensée au camp de Porsenna pour le tuer, et voyant un Capitaine aussi richement accoustré comme un Roy, il executa sur luy son entreprise, pensant avoir faict mourir le Roy: mais tost apres, congnoissant qu'il avoit failly, luy mesme brusla sa main par despit, avec merveilleuse constance, declarant a Porsenna que Trois cens Gentilzhommes Romains avoient juré sa mort aussi bien que luy. Quoy entendu par ledict Roy, et voyant la magnanimité dudict Mutius, mesmes le dangier ou seroit sa personne, se voulant oppiniastrer a la continuation du siege, non seulement ne voulut pardonner a ce Mutius, ains qui plus est, apres avoir pris par acquit certains hostages des Romains, se partit de devant la ville, et retourna en ses pays.

N.

Navire pour un signe du Ciel, c'est celle qui est dicte Argos, en laquelle Jason navigua pour aller conquerir la toyson d'Or.
Nemée est une region d'Archadie, dedans l'une des grandes forestz de laquelle Hercules feit mourir un grand Lyon pour souvenance, dequoy les Argiens establirent des jeux qui furent nommez de Nemée.
Neté, Neté diezeugmenon, Neté hyperboleon, et Neté synemmenon {synnemmenon} sont voix ou nottes assez exposees parmy le texte, parquoy je n'en diray cy autre chose.
Nonacris est une fontaine en Arcadie, dont il est assez parlé dedans le texte, parquoy je m'en tairay en cest endroit.

O.

Ocre est une couleur jaune assez commune entre les {es} Paintres.
Octastyle est une place garnie de huyt Colonnes.
Odeum estoit un lieu propre a chanter.
Oiax entre les Grecz, est a nous le timon ou Gouvernail d'un Navire.
Olympiques, ou Olympiens estoient jeux qui se celebroient de Cinq en cinq années a Pise et a Helide villes de Grece, en l'honneur de Jupiter Olympique, c'est a dire celeste.
Orchestée est une place dedans le Theatre, reservée pour les plus grans et plus apparens personnages, afin de veoir mieulx a leur ayse les esbatemens qui sy faisoient.
Organes instrumens et engins c'est une mesme chose.
Orizon selon Proclus en sa Sphere, est un cercle appellé finiteur ou terminateur, pour autant que cestuy la faict justement les bornes de l'Hemisphere: c'est a dire demye Sphere, car il divise sa rondeur entiere en deux parties toutes egales.
Orion est un signe du Ciel qui se monstre tousjours au commencement de l'Yver, en la saison duquel se troublent la Mer et la Terre, par Pluyes, Gresles, Orages, et Bruynes: Toutesfois quand on veoit ce signe clair et luysant, il signifie que le temps sera beau, et s'il se monstre trouble et obscur, l'on peut attendre grandes emotions en l'air.
Orygies sont machines propres a deffendre les Pionniers qui vont sapper une Muraille.

P.

Pau nommé par les Grecz Eridan est un fleuve d'Italie qui sort du pied de la montaigne Vesul, en la Terre des Genevoys: Toutesfois il ne court gueres loing de sa source, qu'il ne se cache soubz la Terre, puis ressort entre Forly et Faence: Il est appellé Roy des fleuves, pource qu'il recoit en son canal Trente fleuves navigables, dont il porte les eaux en la Mer Adriatique. Voyez qu'en dict Pline au sixieme chapitre de son troysieme livre.
Palestre estoit antiquement un lieu ou les jeunes hommes s'exercitoient a toutes les forces et agilitez de corps et desprit qu'il estoit possible mettre en avant.
Palme est un mot qui a beaucoup de significations: car en premier lieu il signifie la paulme de la main contenant Quatre poulces de large, et de la vient qu'il se met souventesfois pour semblable mesure. Aussi est palme un arbre qui porte les dattes, lequel aucuns veulent dire estre sterile en Italie, et fertile en Espagne, specialement sur les rivages de la Mer, a la verité j'en ay veu en l'un et en l'autre pays: mais je n'y pris oncques de si pres garde, a l'occasion de ma jeunesse, qui ne s'adonnoit encores a teles choses. Si est ce que si ledict arbre porte fruict en Espagne, aucuns tiennent qu'il est amer. En Afrique il en produict de doulx: mais il ne se peut longuement conserver. Et en tous les pays d'Orient il y provient en toute perfection, telement que les habitans en font du pain, du bruvage, et plusieurs autres choses convenantes a leurs necessitez. Nostre Autheur le met quelque fois pour la partie platte d'un Aviron, asavoir celle qui bat les undes, et qui faict nager les Bateaux.
Paralleles sont deux lignes egalement distantes l'une de l'autre.
Paramese, Paraneté synemmenon, Paraneté Diezeugmenon, Paraneté hyperboleon, Parhypate meson, Parhypate hypaton, et autres teles paroles Grecques, sont assez exprimées avec le texte: parquoy en cest endroit ne requierent plus ample declaration.
Parastades ou Parastates, sont compagnons ou coadjuteurs, comme gens de pied a gens de cheval: mais proprement ce sont Soixante soldatz eleuz, qui font un bataillon quarré, dont le Capitaine est appellé Tetrarque: pareillement en un bal, celluy qui suyt apres le premier peut estre nommé Parastate, a raison que si ledict premier failloit, cestuy la pourroit reparer la faulte, et dela est venu que les Arboutans, dont on fortifie les murailles, sont ainsi nommez entre les Grecz.
Parapegma est pris pour tout instrument, Astronomique: mais en particulier, ce n'est sinon la regle attachée sur son doz, car Parapegayo en Grec ne veult dire autre chose sinon je fiche ou attache quelque chose.
Paretoine est un port en la Mer Cirenaique, lequel a Quarante stades en estendue, et dela print son nom la couleur qui est comme Cinnabre de miniere, assez pesante en son espece, mesmes ayant une rougeur bien vive, qui donne bonne grace aux ouvrages ou elle est appliquée.
Paro ou Paros est une Isle des Cyclades, distante de Delos par Trente cinq mille de Mer. Ceste Isle fut premierement dicte Platée, et apres Minoide, l'on y souloit prendre du Marbre dont il se faisoit plusieurs belles figures.
Paphlagonie est une region d'Asie la mineur, de laquelle sortit jadiz un peuple qui s'en vint habiter en Italie, ou il fut incontinent nommé Venitien, tant estimé pour le jourdhuy que sa louenge est espandue par le Monde universel.
Pas Geometrique contient Cinq piedz de mesure.
Pausanias filz de Cleombrotus, fut un Capitaine des Lacedemoniens, lequel a peu de compagnée, y comprenant le secours d'Aristides Athenien, vainquit en la campagne de Platea, Mardonius gendre de l'Empereur de Perse, et de Mede, nonobstant qu'il eust Deux cens mille hommes de pied a l'elitte, et Vingt mille de cheval bien armez: mais a la fin ce Capitaine, apres avoir bien augmenté son pays, d'honneurs et de grandes richesses, laissa vaincre sa vertu aux delices des Persans, et de faict se print a user d'accoustremens, et de table Barbares, mesmes conspira de mettre l'Empire des Lacedemoniens soubz la puissance de Xerses, moyennant qu'il luy donneroit l'une de ses filles en mariage, chose qui fut revelée au conseil de Lacedemone: parquoy le traytre fut banny du pays, et ne peut pervenir a ses attainctes: car comme il se feust retiré au temple de Minerve pour la seureté de sa personne, il fut tué de plusieurs coups, et son corps jetté en une grande fosse, que les Grecz nomment Barathron, ou se mettoient tous malfaicteurs dignes de peine capitale, apres l'execution de Mort.
Pelecinon estoit antiquement un Horloge faict en facon d'une Congnée.
Pentadoron signifie Cinq palmes qui valent Vingt poulces.
Pentamoeros d'ou vient Pentameron, est entre les Grecz, autant que Cinq fois cinq, c'est a dire Vingt cinq.
Pentaspaston est une Mouffle ou bandage en quoy sont mis Cinq poullions. Car Penta signifie Cinq, et Spastos une poullie, cela vient du verbe Grec Spazo, qui vault autant a dire comme je tire.
Pergame estoit une cité d'Asie, qui florit longuement soubz les Roys Attaliques: mais a la fin elle tumba soubz la puissance des Romains. En ceste ville fut premierement inventé l'usage du parchemin pour escrire, Galien prince des Medecins en fut natif, et semblablement Apollodorus le Philosophe precepteur d'Auguste {Aauguste} Cesar. La dedans se gardoient par Lysimachus filz d'Agathocles, les Thresors du grand Roy Alexandre, ausquelz ensemble a plusieurs dignitez seigneuriales succeda ce Lysimachus homme noble et aymant la vertu.
Peridromides sont proprement voyes faictes en rond, comme l'on en veoit encores quelques unes a Rome, aupres des thermes de Diocletian, ou l'on apprend les chevaulx a volter.
Peripteres sont lieux qui ont des allées a l'entour d'eulx, comme il y a aux Cloistres de noz Moynes, et autres places qui sont faictes ainsi pour le plaisir et commodité de ceulx qui en ont la puissance.
Perimetros est ce que nous disons communement la circonference, ou rondeur {roudeur} d'un Cercle.
Peritriton, c'est a dire percé tout a l'entour.
Perseus est un signe au Ciel, dont les Poetes ont fainct de belles Fables qui tendent toutes a des intelligences bonnes et de grand proffit pour ceulx qui les en savent tirer. Voyez quele exposition vous en donnera Fulgentius, environ la fin du premier livre de ses Mythologies: c'est a dire esclarcissement des Fables, et la je pense que pourrez estre satisfaictz de plusieurs choses que je laisse a escrire, pour cause de brieveté.
Pharetre estoit une invention d'Horloge faicte a la forme d'un Carquoys, ou d'une Trousse de Guaynier, en quoy les Archiers tiennent leurs Fleches.
Phasis est un fleuve en Colchos, dont il a esté parlé cy dessus en la description de ce pays la.
Phellos c'est Liege.
Phaeton est fainct par les Poëtes filz du Soleil et de Clymene, et disent qu'Ephaphus Roy d'Egypte l'appella bastard. Parquoy ce Phaeton s'en alla quand et sa mere devers son pere, pour luy demander un don, ce qu'il obtint, avec promesse et serment solennel qu'il ne seroit par luy refuzé, dont Phaeton bien ayse demanda permission de gouverner les chevaulx du Soleil, chose qui luy fut bien enviz accordée: Car le Dieu n'eust ozé rompre son serment. Or advint que ce Phaeton sortant de la voye ordinaire, brula une grande partie de la Terre: quoy voyant Jupiter, il le fouldroya, et feit tumber dedans le fleuve d'Italie, communement appellé Pau, dont dessus a esté parlé.
Phidias fut un sculpteur ou Imagier antique, tant estimé en son art que Pline dict qu'on ne le sauroit assez louer. Il feit d'Or et d'Yvoire une statue de Minerve, laquelle avoit vingt six coudées en haulteur, et en son escu tailla en demy bosse la guerre des Amazones. Voyez qu'en dict icelluy Pline au huytieme chapitre de son Trente quatrieme livre.
Philologie est affection de bien parler, ou de savoir les bonnes lettres.
Philotechnos, c'est a dire amateur de quelque art.
Philosophie, amour de sagesse.
Phisiologie est le plaisir que l'on prend a parler des choses natureles.
Phtongi, ce sont resonances de voix, ou de cordes d'Instrumens.
Pinacoteques estoient lieux ou les antiques souloient tenir leurs tableaux de platte paincture, Vases d'Argent enrichiz de beaux ouvrages, Tapisseries, accoustremens, Images de relief, et autres ornemens de maison. Nous appellons maintenant ces lieux la Cabinetz.
Pinna est une antique ville d'Italie au territoire des Vestins, peuples qui sont entre les Mauriciens et Sabins, selon aucuns, ou selon les autres entre lesdictz Sabins et la Marche d'Ancone, mais encores quelzques uns tiennent que leur habitation est entre les Martiens, et les Sabins dessus nommez.
Pirée estoit un port d'Athenes, ou il venoit grande affluence de Marchans: Il contenoit deux mille pas en longueur, telement qu'il y avoit bien place pour Quatre cens Navires.
Pisistratus fut Athenien filz d'Hippocrates, noble de race, et tant riche d'eloquence, que ces concitoyens emmiellez des fortes persuasions dont il usoit, se despouillerent voluntairement de leur propre liberté, et la meirent entre ses mains, nonobstant qu'ilz n'eussent en ce monde chose plus chere que ceste la: Car si grande fut la vertu de ses paroles, que ce peuple en estima plus la doulceur, qu'il ne feit la reverence de Solon, premier instituteur de leurs loix. Ce Pisistratus fut celluy qui avant tous autres feit une librairie commune en Athenes: mais depuis le grand Roy Xerses ayant pris la ville d'assault, emporta tous les livres en Perse, et plusieurs longues années apres Seleucus Nicanor, fut moyen d'en reparer de rechef ladicte ville. Durant le regne de ce Pisistratus, il commanda que les vers d'Homere qui estoient en forme de chansons feussent, reduictz en l'ordre ou ilz sont maintenant.
Pythagoras fut un Philosophe natif en l'Isle de Samos, son pere fut nommé Demarathus, riche marchant, et grand negotiateur tant aux provinces loingtaines, que circunvoysines. Ce Pythagoras ayant merveilleusement grande envie d'apprendre l'Astrologie s'en alla premierement en Egypte, et tost apres en Babilone, puis retourna en Crete, et de la s'en voulut aller a Lacedemone, pour ouyr les loix de Lycurgus, et de Minos, qui avoient singuliere authorité en ce temps: Apres il vint en Italie et feit la residence a Cotron, ou trouvant le peuple adonné a toute luxure, tant proffiterent ses remonstrances, avec son authorité et doctrine, qui le remeit en voye de bien et honnestement vivre, en sorte que toutes les femmes plus dissolues se reduirent a chastete, et les jeunes hommes a temperance, mais ses propoz furent de tele efficace, que les dames pompeuses a desmesure, donnerent tous leurs beaux accoustremens au Temple de Juno: Parquoy Pythagoras ayant esté cause de ce grand bien, partit de Cotron, et s'en alla en Metapont, ou il mourut bien tost apres, et de sa maison fut faict un Temple, ou le peuple l'adora comme un Dieu. Il florissoit en Italie durant le regne de Servius Tullius sixieme Roy des Romains. Son opinion estoit que les ames par mort separées des corps humains, r'entroient incontinent en d'autres, jusques aux bestes brutes, et parce deffendoit l'usage de la chair. Quelzques uns disent aussi qu'il ne mangeoit point de Feves, de ma part je m'en rapporte a ce qui en est: mais je ne veuil oublier en cest endroict, la sentence de deux vers qui furent faictz a sa louenge: c'est que sa pensee penetroit jusques au Ciel, et que les choses nyées par nature a la veue des hommes, luy estoient congneues au moyen des yeulx de sa prudence, mesmes les tenoit enfermées en sa poytrine
Pythius fut pere d'Apelles l'excellent Paintre.
Pythiens estoient jeux instituez en l'honneur d'Apollo, {Aapollo} qui avoit tué le grand serpent Pytho, ou comme veult Strabo en son neufieme livre, un mauvais et dangereux homme, qui estoit surnommé Dragon. Les victorieux en ces jeux la estoient pour tesmoignage de leur vertu, ornez de belles statues que l'on faisoit a leur semblance.
Planes sont arbres qui ne portent point de fruict, et sont estimez seulement pour leur umbrage. Voyez qu'en dict Pline au premier chapitre de son Douzieme livre.
Platea estoit une cité en Beotie, située au pied de la montaigne Citeron, en la campagne au dessoubz d'icelle ville. Pausanias et Aristides vainquirent Mardonius chef de l'armée du Roy Xerses.
Platon estoit divin Philosophe, et tenu pour tel, entre tous hommes aymans les bonnes lettres, il fut né en Athenes le propre jour qu'Apollo nasquit en Delos, au commencement de son aage le nom d'Aristocles luy fut donné, ainsi quele portoit le pere de son pere. La taille de son corps fut celle que nous appellons riche, c'est a dire entre la grande et la moyenne: mais la croisure de ses espaules se monstroit si large, qu'un maistre d'Escrime soubz lequel ce jeune homme se dressoit, le nomma premierement Plato, qui signifie large. En toutes les choses dont il se voulut entremettre son excellence fut exquise et admirable. Toutesfois son affection s'adonna mieulx a la Philosophie qu'ailleurs, aussi certes il proffita si bien que ceulx qui en eurent congnoissance l'appellerent l'Homere des Philosophes: car tele estoit son eloquence que l'on disoit communement si Jupiter vouloit parler en Grec, il parleroit comme Platon. Sa premiere estude fut soubz Socrates en Athenes, et dela vint en Italie pour ouyr les Pythagoristes, ou nonobstant qu'il eust assez affaire d'argent pour l'entretenement de sa famille, si acheta il les livres de Philolaus de Cortone, le pris de Cent mines d'argent, valant chacune mine d'argent Dix escuz couronne, et de ces livres s'ayda grandement en son Timée. Apres il alla en Egypte pour ouyr les Gymnosophistes, et feit porter force charges d'huyle quand et soy, afin de les vendre a son besoing. La dict on qu'il eut congnoissance des livres de Moyse, estant donc retourné d'Egypte, il navigua par trois fois en Sicile. La premiere afin de veoir le feu de la montaigne Ethna de present Mongibel. La seconde pour parler au jeune Denys le Tyran, qu'il esperoit persuader a la liberté de ceste contrée, et la troisieme contre sa volunté, quand il y fut appellé par Architas de Tarente, les Pyrates ou Coursaires de Mer, le prindrent une fois aupres d'Egine, et le vendirent Trente mines. mais il fut rachetté par un Nicetes de Cyrene. Ce Philosophe mourut en l'an Quatre vingtz et unieme de son aage, d'une maladie que les Grecz appellent Phtyriasis: c'est a dire corruption de chair, d'ou il sort de la vermine ainsi comme de formieres.
Pleiades sont les estoilles que nous disons la Poule et les Poussins. Noz antiques Latins les appellerent Vergilies, pource qu'elles commencent d'apparoit au Printemps, quand se faict l'Equinocce: c'est a dire lors que la Nuyt se rend pareille au Jour.
Plenthigoma est un Auget quarré, dedans lequel se mettoit la charge que l'on vouloit faire jetter a une fonde ou Bacule de Guerre.
Plinthe est un membre plat et quarré en massonnerie ou menuyserie, il s'applique en plusieurs endroitz: car il se met tant dessoubz que dessus le Piedestal, et tousjours est la premiere partie de la base.
Pneumatiques sont instrumens qui moyennant un air enclos rendent et font des effectz merveilleux, comme les Orgues qui se voyent a ceste heure en usage.
Polycletus estoit sculpteur ou Imagier de Sydon, l'un des plus excellens qui oncques furent, son maistre fut nommé Agelades. Entre autres choses il feit une fois des joueurs de Dez si perfectement representans le naturel, qu'on n'y eust sceu que ramender: Une autre fois il luy print volunté de faire deux statues faisantes un mesme acte, l'une suyvant son art, et l'autre selon la fantasie du peuple qu'il oyoit voluntiers deviser, et de faict il s'en contenta: puis meit ses deux pieces en veue, mais la sienne fut la premiere, qui fut grandement estimée, et l'autre apres, qui ne plaisoit pas tant. Adonc ce gentil ouvrier se print a dire a ceulx qui s'en faisoient juges. Sachez que j'ay faict la premiere: mais vous avez ordonné la seconde, et par ce moyen fut congneu que l'invention d'un ouvrier bien exercité en son art, est a preferer au discours d'une multitude confuse {confufe} qui ne parle sinon a la vollée
Polispaston est une Mouffle ou bandage en quoy sont plusieurs poulions.
Poliorcetes c'est a dire preneur et ruyneur de Villes.
Pont est une region d'Asie la mineur, bornée du costé d'Occident, par le fleuve Haly, de l'Orient, du pays de Colchos dont dessus est faicte mention, {mentoin} devers le Midy, de la petite Armenie, et en la partie de Septentrion, de la Mer que l'on dict Euxine. En celle region du Pont regnerent Mithridates, Eupator, et la Royne Pythodoris.
Proconnesse est une Isle en la Mer propontide, seule habitée entre les autres, de la s'apportoit le beau Marbre dont les antiques Imagiers et Tailleurs de Pierres souloient faire de beaux ouvrages.
Pretus de qui Melampus guerit les filles, fut filz du Roy Abas, l'un des douze qui regnerent en Arges, filz de Lynceus et d'Hypermestra sa femme, toutesfois aucuns veulent dire que Belus fut son pere. Ce Roy Abas estoit merveilleusement bon chef de guerre, et homme de subtil entendement. Il regna vingt et trois ans, selon Eusebe: son filz Pretus fut pere d'Acrisius, et ayeul de Perseus tant renommé.
Preteur est le juge delegué par un seigneur ou seigneurie, pour aller administrer Justice aux subjectz en divers lieux de la jurisdiction.
Pronaos c'est a dire devant de Temple.
Proslamuanomenos, entre les Musiciens antiques se disoit un son acquiz, mais ceulx de ce temps veulent que ce soit une notte en la game de la main. laquelle ilz disent communement A. Re.
Prostades sont piedroitz, ou jambages de portes.
Prosorthas signifie ligne a plomb tumbant sur une traversante ou droitte, et par ce moyen faisant un angle droit ou deux.
Prothyrides sont Fronteaux, Claveaux, ou Lyntheaux d'huysseries.
Pseudisodomon c'est une muraille faicte de lictz de massonnerie plus grans les uns que les autres.
Pseudodipteros signifie faulses aelles.
Pteromatos, c'est a dire ayant des aelles.
Ptolemee Lagus fut un des Capitaines d'Alexandre, apres la mort duquel, ce Ptolemée se feit Roy d'Egypte, d'Afrique, et d'une grand part d'Arabie, il regna Quarante ans, et de son nom tous ses successeurs Roys d'Egypte furent appellez Ptolemées. Ce Roy ne vouloit posseder sinon ce que luy estoit necessaire pour son usage, et disoit que l'office d'un Roy estoit plus tost de faire les autres riches, que de l'estre soymesme. Il eut deux filz et une fille. Le premier, nommé Ptolemée Philadelphe, le second, Ptolemée Ceraunus, et la fille, Arsinoé, avant sa mort il feit couronner son filz Philadelphe qui estoit docte le possible, et souverain amateur des lettres, aussi avoit il esté disciple de Straton le Philosophe qui l'avoit curieusement institué. Ce fut celluy qui ordonna la belle librarie dont est faicte mention dedans le texte de Vitruve il regna Trente et huit ans. Incontinent apres la mort de son pere, il chassa de ses pays son frere Ceraunus, lequel se retira devers Macedoine dont il debouta Seleucus qui avoit tué Lysimachus mary de sa seur Arsinoê laquele en estoit Royne, et apres la mort de cest usurpateur, ledict Ceraunus espousa sa propre seur, mais durant l'appareil des nopces il feit tuer deux enfans ses neveux qu'elle avoit euz de Lysimachus. Quoy voyant la dolente mere, a grand regret s'enfuyt du pays, et se retira en Samothrace, mais cest enorme crime ne demoura longuement impugny: car le malheureux Ceraunus par hyronie ou sens contraire surnommé philadelphe fut tué, par celle partie des Gaulois qui allerent en Macedoine, soubz la conduicte de Belgius frere de Brennus. Celluy donc qui succeda au royaume d'Egypte apres le premier Philadelphe, fut surnommé Euergetes, c'est adire bien faisant, il ne regna sinon vingt six ans. Luy mort Ptolemée philopator print l'administration du Royaume, et la garda Dixsept ans, apres y eut Ptolemée Epiphanes qui regna vint quatre ans, et son regne finy, Philomator en print la possession qui luy dura Trentecinq ans. puis elle vint au second Euergetes, lequel regna vingt et neuf ans, apres luy Soter en jouyt Dixsept ans, et finablement en fut Roy Ptolemée Dyonisius frere de Cleopatra, lequel feit trencher la teste a Pompée, pour en faire present agreable a Cesar.
Publius Numidius estoit un capitaine Romain auquel ce surnom fut donné pour avoir vaincu les Cartaginiens qui paravant avoient esté appellez Numidiens.

R.

Redondance vault autant adire comme emotion ou concussion, ainsi que d'une eau tourmentée.
Replum est ce que noz ouvriers disent doulcine, et les Italiens goule droitte ou renversée.
Rhin est le fleuve qui separe la Germanie de la Gaule, et se va par trois bouches jetter en la mer de l'occean Septentrional. {Septenttional}
Rosne est un fleuve qui sort des Alpes, lesquelles font la separation de Gaule, d'Alemagne, et d'Italie, sa source n'est gueres loing de celle du Rhin, et du Danube, son cours est tant impetueux que les bateaux ne peuvent {peuent} remonter contremont, sans grande force de chevaux, il passe atravers le Lac de Geneve, et au dessoubz la ville de Lyon se joinct a la riviere de Saone puis en allant devers Mydi, les rivieres d'Isere, et de Durence, entrent en son Canal, et apres il se va jetter en la mer de Provence, assez pres de Marseille.
Rhodes est une isle des Cyclades, et la premiere (selon Pline) que rencontrent ceulx qui viennent du Levant, elle est la troisieme entre les memorables d'Asie, Car Lesbos et Cipre sont plus grandes, elle est tant renommée entre les Crestiens, que ce seroit superfluité d'en plus escrire.
Ruderation est ce que les ouvriers appellent communement repous, et d'autant que ce mot est assez exposé dedans le texte, je n'en tiendray icy plus long propos.

S.

Sagitaire est l'un des douze signes du Ciel.
Salmacis est une fontaine assez descrite par Vitruve.
Samos signifie haulteur et sublimité, c'est le nom de deux isles, l'une en la mer Icarienne, et l'autre aupres d'Itaque, En la premiere nasquit le philosophe Pythagoras, dont cy dessus est faicte mention.
Scopas fut un Imagier excellent natif de Siracuse. Il florit du temps que la Royne Artemisia faisoit faire son Mausolée, et y fut employé comme plusieurs autres bons ouvriers.
Scopinas aussi de Siracuse, fut grand Mathematicien.
Scorpion est un des douze signes du Ciel, c'est aussi un instrument de guerre que nous disons communement une Arbaleste.
Septentrion est un signe du Ciel communement appellé Chariot.
Sicile est une isle d'Italie ainsi nommée d'un Siculus filz de Neptune, elle souloit antiquement estre terre ferme conjoincte a ladicte Italie, mais la Mer peu a peu mina la terre, de sorte que finablement elle en feit la separation. Ceste isle est en forme de triangle, et sur chacune poincte à une montaigne, dont la premiere qui regarde vers le Mydi, est appellée Pachin, l'autre du costé de Septentrion, Pelorus, laquelle n'est eslongnée d'Italie sinon de Mille cinq cens pas, puis la tierce tournée devers Afrique, se nomme Lilybée, et n'y à de distance entre deux, sinon Douze mille de traverse ou environ.
Syene est une ville située sur les finages d'Ethiopie et d'Egypte, toutesfois quelzques uns veulent dire qu'elle est en Egypte, et d'autres qui regardent encores de plus pres, ne la mettent seulement en Egypte, ains en Thebaide qui est une province d'icelle Egypte, sa situation du costé de Mydi, est Cinq mille plus hault qu'Alexandrie, droittement soubz le Tropique de Cancer ou de l'Escrevice, si que quand le Soleil est en ce signe a l'heure du Mydi durant le solstice, ses rayons tombans de droit fil sur la ville ne font rendre umbre a aucune chose que ce soit.
Smyrne est une ville d'Ionie en Asie la mineur, qui fut ainsi appellée du nom de la femme de Theseus le Thessalien, lequel premierement l'edifia. Strabo dict que les Lydiens la ruynerent une fois, et qu'elle demoura pres de Quatrecensans habitée comme un village, mais a la fin Antigonus la repara, si feit aussi Lysimachus, telement qu'elle fut la plus belle de toutes les autres villes d'Ionie, une partie de son pourpris est sur le pendant d'une montaigne, et l'autre en une belle plaine, reservé le port, le gymnase ou lieu des exercices, et la retraicte des Matrones, les rues sont droittes le possible faictes par belle ordonnance, mesmes sont si bien pavées qu'il n'y à que redire. Les portiques ou promenoers sont grans, amples et quarrez, leur parterre mis a l'uny et relevé competement sur le rez de chaussée: mais il y à entre autres choses une belle librairie surnommée Homerique, garnye d'un beau portique tout quarré, et ennoblye d'un temple consacré a Homere, dedans lequel est sa statue, artistement taillée apres le naturel, chose que ce peuple à faict faire, a raison qu'il estime ledict Homere avoir esté né en sa ville, et encores pour luy faire plus d'honneur, les habitans usent entre eulx d'une piece de monnoye d'Arain qu'ilz nomment communement un Homere. Le fleuve Melas tourne deux fois environ ses murailles, et d'avantage le port se peult fermer, toutes et quantesfois que l'occasion s'en presente.
Socrates estoit un philosophe d'Athenes, filz d'un nommé Sophroniscus lapidaire, et de Phanariste sagé femme ou matrone secourante aux autres femmes au poinct de leur enfantement, il fut premierement disciple d'un Archelaus phisicien, ou philosophe naturel, mais congnoissant que la speculation des choses natureles n'apporte le fruict qui est requis a bien et heureusement vivre, il se meit le premier a philosopher sur les meurs des hommes, et en parla tant bien, mesmes se monstra si constant en toutes choses, qu'il fut estimé le plus sage du monde, aussi jamais vivant ne luy veit changer de visage, pour chose bonne ou mauvaise qu'il luy peust advenir. Il eut deux femmes espousees tout en un temps, l'une dict Xantipé, et l'autre Myrto, qui tensoient souventesfois ensemble, dequoy Socrates se mocquoit, leur disant qu'a l'occasion de luy qui estoit homme laid à merveilles asavoir, camus, chauve, velu comme un ours et ayant les Jaretz tortuz, elles ne devoient se donner tant de peine, dont une fois tant leur en deit, que toutes deux se getterent sur luy, et le battirent tresbien, si quil fut contrainct s'enfuyr, et en ces entrefaictes rencontra un sien amy nommé Alcibiades, qui luy demanda pourquoy il enduroit deux tant mauvaises femmes en sa maison, adonc sa responce fut, qu'avec elles il s'accoustumoit a supporter plus patiemment les injures et oultrages qu'on luy pourroit faire par la ville. Beaucoup de singulieres choses se disent de ce philosophe, lesquelles seroient trop longues a racompter, parquoy ceulx qui auront envie de les savoir, pourront lire le Troisieme livre de l'orateur de Cicero, et la ilz seront satisfaictz: Mais pour toucher le faict de sa mort, il fut accusé par un riche homme dict Anytus, par un Melite poëte, et par un Lycon orateur, qu'il medisoit irreveremment des Dieux, et de leur adoration, parquoy force luy fut boire de la Cigue, qui estoit antiquement en Athenes une espece de mort dont on punissoit les malfaicteurs, et par ce moyen le povre homme mourut, puis incontinent apres le peuple se trouva si desplaisant de l'avoir perdu par fause accusation, qu'il feit mourir deux de ses accusateurs, et le riche senfuyt en exil. Depuis aussi pour amender l'offense faicte en la personne d'un tant juste et excellent personnage, les magistratz d'Athenes luy feirent dresser en plain marché une statue de cuyvre, afin de perpetuer sa memoire. Voyez si bon vous semble qu'en dict Platon en son dialogue intitulé Phedon ou de l'immortalité de l'ame, et en l'autre dict Criton, ou de ce qu'on doit faire, nouvellement mis en Francoys par un vertueux prelat de ce royaume.
Spectacle signifie aucunesfois une chose que lon regarde, aucunesfois l'acte de regarder, et d'autres le lieu convenable pour faire veoir quelque passetemps au peuple, mesmes peut estre un petit trou parmy lequel on guigne ou borgne ce que lon tasche regarder.
Spire est la base qui se met dessoubz l'empietement des colonnes.
Stade est un lieu auquel courent hommes ou chevaux, et ou les Athletes s'entrepreuvent, il contient en longueur la huitieme partie d'une demy lieue, et pour bien dire, il faict Centsix vingt cinq pas communs, qui valent Cent vingt cinq piedz.
Stix est une fontaine sortant goute a goute d'une roche aupres de Nonacri en Arcadie, l'eau en est de si froide nature qu'en peu de temps se convertit en pierre, et si quelqu'un en boit il est mort tost apres: elle ne peult estre portée en vaisseau de quelque matiere que ce soit, sinon dans le pied d'une Mule, lon dict, mais je ne scay si c'est a tort, ou a droict qu'Alexandre le grand fut empoysonné de ceste liqueur, par le conseil d'Aristote son precepteur en philosophie. Il y à semblablement aupres de Memphis en Egypte, un Maraiz de ce nom, environnant l'isle dicte Avaton, c'est adire inaccessible, dont parle assez Heliodore, qui depuis nagueres à esté heureusement traduict en Francoys. Les poëtes ont fainct que ledict Stix est l'un des fleuves d'Enfer, et que les Dieux juroient seulement par cestuy la, si qu'il ne leur estoit loysible de faulcer tel serment, autrement ilz estoient par Cent années privez de la fruytion du Nectar leur bruvage, et ce pendant ne leur estoit faict ny sacrifice ny adoration, Iceulx poëtes disent aussi que Victoire fut fille de ce fleuve, et qu'elle donna grand secours a Jupiter en la guerre que luy feirent les Geans, en recompense dequoy ce Dieu souverain commanda que nul des celestes feust de lors en avant si hardy de jurer par le fleuve Styx, qui signifie tristesse, laquelle est totalement contraire a la joye qui les tient en Immortalité.
Stilobates sont piedestalz ou fondemens de colonnes.
Subsolanus est un vent contraire a celluy que lon dict Favonius ou Zephirus, les Grecz le nomment Apeliotes.
Sunium est un promontoire pres d'Athenes.
Suse est la ville metropolitaine ou capitale du royaume de Perse, ainsi nommé d'un fleuve de ce nom, aucuns veulent dire qu'elle fut premierement ediffiée par Tithon mary d'Aurora, et pere de Mennon, mais Pline veult que ce ayt esté par un Darius filz d'Hidaspes. En ceste ville souloit estre la maison Royale de Cyrus, admirable et presque incroyable en richesses, c'est ou le Roy Assuerus feit son grand festin dont il est tant parlé en la Bible.

T.

Talent estoit durant l'antiquité une espece de monnoye, et de poix de plusieurs manieres. Pline dict qu'il valloit à Rome Seze sesterces, c'est a dire quarante mines ou livres, d'autres disent Soixante qui faisoient la somme de Six mille deniers ou drachmes, laquelle selon Budé, est maintenant a nous Six cens escuz coronne, qui en vouldra veoir d'avantage lise cest autheur en son Epitome ou abregement de Assé, et la il sera satisfaict.
Tanais est un fleuve de la Scythie maintenant Tartarie, lequel separe l'Asie de l'Europe.
Terracine est une cité pres de Rome.
Tetracorde est un instrument de Musique a Quatre cordes faisant resonnances diverses.
Tybre est le fleuve qui passe a Rome, tant renommé qu'il n'est ja besoing d'en faire icy aucune mention.
Tales fut un des sept sages de Grece, premier inventeur entre les Grecz de la Geometrie. grand inquisiteur des choses naturelles, et singulier contemplateur des celestes. Aucuns afferment que ce fut luy qui divisa premierement les saisons de l'année, et predit avant tous autres l'eclipse du Soleil, aussi donna il commencement a la secte Ionique, comme Pythagoras feit a l'Italienne.
Tarse estoit antiquement la ville metropolitaine du pays de Cilicie, son fondateur selon aucuns, fut Perseus filz de Danaé, et les autres l'attribuent a Sardanapalus, en ceste la nasquit sainct Paul l'apostre, dont elle est plus honorêe que de tous les autres biens qui furent jamais en elle.
Theatre est un bastiment faict en forme d'un demy rond, propre a faire veoir des jeux et passetemps a un grand nombre de peuple.
Telamons se souloient prendre par les Latins au temps de Vitruve, pour figures d'hommes soustenantes quelzques parties d'edifices, mais il ne veult approuver tele chose, ains dict qu'il ne scait la raison qui les mouvoit, et que les Grecz a meilleure cause les nomment Athlantides du nom d'Athlas Roy de Mauritanie en Afrique, lequel fut frere de Prometheus, et faignent les Poëtes que c'estoit un Geant soustenant le Ciel sur ses espaules, pour autant qu'il fut le premier enseignant aux hommes le cours du Soleil, de la Lune, et des Estoilles. A la verité ceste fiction faict que les figures ou Images soustenantes grans fardeaux, se devroient plustost nommer Athlantides {Atlhantides} que Telamons: car Telamon fut Roy de l'isle Salamine en Euboée pres d'Athenes, pere de Teucer et Ajax, qui se trouverent au siege de Troye avec Achilles, apres la mort duquel, icelluy Ajax voulut avoir ses armes, ce qu'il ne peut obtenir contre Ulixes, a l'occasion dequoy il se tua soymesme, comme deduit bien amplement Ovide au Troizieme livre de sa Metamorphose: et ne voy de ma part non plus que Vitruve: pourquoy lon doyve appeller en edifices les consolateurs Telamons, si ce n'est pource que ce Roy au retour de Troye, porta fort impatiemment la mort du susdict Ajax, voire jusques a en bannir son second filz Teucer, d'autant qu'il ne l'avoit vengée, mais j'en laisse le jugement a ceulx qui ont plus leu, lesquelz, paravanture, pourront cy apres mettre les lecteurs hors de doubte.
Themistocles fut un gentilhomme Athenien, filz d'un grand personnage appellé Neocles, ce jeune homme en son adolescence estoit prodigue, et fort lascif, mais quand il fut esleu Capitaine de la Republique, soudainement se convertit a faire des choses grandes et dignes de memoire: car en premier lieu il feit edifier le port de Pirée fort utile et necessaire pour les Atheniens, puis vainquit les Persans en guerre faicte sur la mer, aupres de l'isle Salimine, ce neantmoins apres plusieurs gestes Heroiques, le peuple de son pays ingrat, le chassa et meit en exil, telement qu'il fut contrainct se retirer par devers le grand Roy Xerses, commun ennemy de la Grece, lequel incontinent l'institua conducteur de son armée pour aller contre les susdictz Atheniens, et lors voyant ce noble cueur le peril eminent appareillé a son pays, pour garder la foy a son maistre, et n'estre accusé de cruaulté contre ceulx de sa propre nation il avalla tout expres sang de Toreau, et par ceste poyson mourut, Plutarque dict qu'aucun ne luy doit estre preferé en gestes vertueux et dignes de memoire: mesmes que peu luy sont semblables, il estoit d'une si grande memoire, qu'il desiroit apprendre un art pour oublier assez de choses, dont a son advis il se feust bien passé.
Theophraste estoit un philosophe natif d'Eresse en l'isle de lesbos, il fut premierement nommé Tyrtan, son precepteur estoit Aristote, qui le rendit le plus docte et le mieulx parlant de tous les Peripateticiens. Entre autres choses il disoit que l'homme savant est le bien venu en tous pays, et qu'il y peult tousjours acquerir des amys.
Thrascias est un vent qui soufle entre le Septentrion, et l'Occident Solsticial.
Thessalie est une region de Grece qui souloit estre du domaine des Atheniens, elle à d'un costé le pays de Beotie, et de l'autre la Macedoine, son nom jadis estoit Emonia, mais depuis il fut changé en Helas, et finablement print celluy de Thessalie, d'un Thessalus filz d'Aemon, ou bien de Jason, et de Medée: Toutesfois encores escrit Strabo que sa premiere et plus antique nomination estoit Pyrrhée, du nom de Pyrrha femme de Deucalion: En ce pays nasquit le Roy Grecus qui à donné le nom a toute la contrée de Grece, qu'elle retient encores a present.
Thiroreion est une allée entre deux portes.
Thole est la clef ou piece du mylieu en quoy s'assemblent toutes les courbes d'une voulte, et la antiquement se souloient pendre les dons qui estoient faictz a un Dieu en quelque temple, aucunesfois aussi on le prend en bastimens pour un pinacle, tabernacle, ou lanterne.
Thuscane est une region d'Italie maintenant le pays des Florentins.
Thyrrene est la mer qui bat la coste du pays de Tuscane, et fut ainsi nommée a raison que le Dieu Bacchus estant une fois en son enfance endormy sur le rivage, aucuns mariniers Tyriens, ou de la ville de Tyr en Phoenicie de Syrie le prindrent et porterent en leur navire, et quand il fut esveillé, soudainement leur demanda quele part ilz le vouloient porter, a quoy luy respondirent la ou seroit sa volunté. Adonc il leur commanda tirer devers l'Isle Naxos qui lors luy estoit consacrée, ce qu'ilz ne feirent, ains tournerent les voiles pour singler autre part, dequoy ce Dieu s'apercevant leur feit avoir une vision de Tigres, qui par semblant les vouloient estrangler, et de la frayeur qu'ilz en eurent se jetterent d'eulxmesmes en la mer, qui depuis en fut appellée Tyrrhene en abregeant le mot de Tyrienne.
Tyburtine est la voye par ou on va de Rome a Tyvoli, qui souloit antiquement estre appelléé Tybur.
Tigris est un grand fleuve qui selon l'escriture saincte, provient de Paradis terrestre, et descend devers l'Assirie, puis apres plusieurs tournoyemens, s'en va jetter en la mer rouge: toutesfois aucuns veulent dire que sa source est Armenie, au nombre desquelz sont Pline et Strabo lesquelz disent que du commancement le cours de son eau est tardif, mais quand il est parvenu jusques au finage des Mediens. Adonc ce faict nommer Tigris, signifiant en leur langage une sagette, pource qu'il court presque aussi viste qu'une fleche descochée d'un puissant Arc, ou qu'une beste sauvage appellée de ce mesme nom pour sa merveilleuse legiereté. De la il s'en entre dedans le lac Arethusa, et passe atravers sans que les eaux se meslent en aucune maniere, ny mesmes les poissons que l'une et l'autre produysent. Sortant de la il passe parmy l'Arabie, apres ceinct la Mesopotamie et recoit en soy les fleuves Hidaspes, et Eufrates, puis se va jetter dedans la mer Persane.
Timave souloit estre le nom d'un fleuve qui maintenant s'appelle Taillement sa source est au pays de friol pres d'Italie, il passe joignant la ville d'Aquilée, puis tumbe par une Cataracte du hault a bas des montaignes et adonc s'abysme en la terre, par dessoubz laquelle son cours se continue environ cent stades, puis se jette en la mer de Venise.
Tuf est une espece de terre aspre et ferme: mais qui facilement se reduyt en sablon: toutesfois quand les ouvriers qui font les fondemens d'un edifice, la rencontrent ilz ne passent plus oultre, ains commencent a massonner la dessus.
Tragedie est une espece de Poësie en laquelle sont introduitz grans seigneurs et autres graves personnages, qui commencent tousjours par quelzques choses delectantes mais la fin en est triste et doloureuse pource qu'il en ensuyt, discordes, emprisonnemens, bannissemens, meudres et autres calamitez redoubtables a toutes gens de bon entendement.
Trales est une ville en Lydie assez pres de Magnesie, il en est aussi une autre de semblable nom en Phrigie sur les limites de Carie.
Triglyphes sont ornemens en massonnerie et menuyserie, ou il y à des concavitez comme oches de Sagettes, et pource que Vitruve en parle assez et donne la raison de les faire, je ne m'estendray a en deduyre plus avant.
Trité diezougmenon est une voix ou note en la reigle de main laquele se dict a present C. sol fa ut.
Trité hyperboleon vault autant en nostre Musique comme fa ut le hault.
Trité synemmenon se peult referer a. B. fa. B. My.
Trophées sont enseignes de victoire, mise en apparence devant les passans a savoir despouilles et butins faictz en guerre par mort ou fuyte d'ennemis.

V.

Vejovis estoit antiquement dict tout Dieu qui n'avoit puissance d'ayder, mais seulement de nuyre.
Venise est une excellente ville en la mer Adriatique, elle fut fondée en lan Quatre cens cinquantequatre, apres la passion de nostre seigneur Jesuschrist durant qu'Atila, Roy d'Hongrie ruynoit l'empire de Rome.
Venus estoit par les antiques estimée la deesse d'Amours, mais les Poëtes ont fainct qu'il en à esté trois, la premiere fille du ciel et du jour laquelle enfanta Cupido et les trois graces du faict de Jupiter selon aucuns et selon les autres de Bacchus. La seconde engendrée du membre viril du Ciel, que Saturne son filz luy couppa d'une faulx en dormant, puis le jetta dedans la mer, qui receut la semence en son escume, et la tierce qu'ilz disent estre fille d'icelluy Jupiter, et Dione femme de Vulcan, et amye de Mars.
Vergilies autrement Pleiades, sont {sout} les estoilles, qui achevent le signe du Toreau, et lesquelles a leur premiere apparoissance monstrent aux mariniers que le temps de naviguer est ouvert, le commun peuple les nomme en un mot la poussiniere. Les Poëtes disent qu'elles sont sept en nombre, et les faignent filles d'Atlas, et de la Nymphe Pleione, mesmes asseurent que Jupiter eut leur compaignie, a raison dequoy son plaisir fut les colloquer au nombre des estoilles, toutesfois il s'en treuve d'autres qui alleguent diverses autres raisons que {qne} je laisse pour cause de brieveté, leurs noms sont Electra, Alcyoné, Celeno, Meropé, Asterpé, Tageta, Maia, dont la premiere est plus haulte: asavoir Electra ne se peult veoir fors a grand peine pource (que comme disent iceulx Poëtes) ceste la seule fut mariée a un homme mortel dict Sisyphus, et toutes les autres aux Dieux, pourtant se cache elle de honte ou a raison qu'elle ne peut oncques endurer de veoir la ruyne de Troye, ains meit la main devant ses yeulx.
Vierge est un des douze signes du Zodiaque par ou le Soleil passe au moys d'Aust et les Poetes faignent qu'elle fut fille de Jupiter et de Tethis, engendrée durant l'aage d'Or, durant lequel elle donnoit loix aux hommes qui par son moyen conversoient ensemble en toute amytié sans aucune deception: parquoy luy fus donné le nom de Justice, mais quand l'aage d'Argent commencea, et que lesdictz hommes devindrent avaritieux, perpetrans a ceste cause plusieurs crimes enormes les uns contre les autres, ceste vierge se retira au ciel, et depuis n'en osa descendre. Voyez qu'en dict Hyginius, en son second livre ou il traicte des signes celestes.
Vertu est affection convenable a un courage constant, et qui rend l'homme louable dedans lequel élle se met, mesmes qui estant par soy voluntairement separée, se faict priser pour son utilité, le Poëte Horace la deffinit autrement et dict que c'est fuyr le vice, qu'il estime la plus grande sagesse du monde. Aristote veult que ce soit une accoustumance choysie, permanente entre les extremitez de bien et de mal. Seneque afferme que ce n'est autre chose sinon une droitte raison. Mais sainct Augustin en son quatrieme livre de la cité de Dieu, tesmoigne que les antiques l'ont deffinie Art de bien et heureusement vivre, et de faict l'adoroient pour une déesse, toutesfois icelluy sainct Augustin {Agustin} escrit que ce n'est fors un don de Dieu, et de ce le fault croire par dessus tous les autres.
Vesuve {Vesune} est une montaigne de la Campagne au Royaume de Naples, bien chargée de vignes et arbres fruyttiers, nonobstant que son coupeau soit sterile pour avoir au temps passé longuement jetté feu et flambe. Voyez qu'en dict Sannazar en son Arcadie.
Umbrie est la partie d'Italie que nous disons a ceste heure la Marque d'Ancone.
Voix est un son ou battement d'Air qui provient de l'estomach par la gorge, et se forme en la bouche, au moyen de la langue et des dentz qui l'empeschent de sortir confusement, cela se prononce en tele maniere que les hommes s'en peuvent entendre.
Volupté est une joye desmesurée {desmuserée} qui se recoit par la jouyssance de quelque bien present. Elle s'attribue au corps et a l'esprit, combien que les Epicuristes l'assignent seulement audict corps, mais ceste la, n'est aucunement louable, ains selon Platon, est la source de tous maulx. Et au contraire celle de l'esprit est qui nous faict gouster en ce Monde les choses immortelles et celestes.
Vulcan selon la fiction des Poëtes, est le Dieu du feu, et forgeron des Dieux: Il feit les fouldres, dont Jupiter fouldroya les Geans a lors qu'ilz luy faisoient la guerre. Cicero en son troysieme livre des Dieux en parle tant que ce seroit superfluité a moy d'en traicter en cest endroit.
Vulturne est un vent qui soufle en l'Orient d'yver, et à pris son nom d'un Vaultour oyseau volant avec impetuosité merveilleuse: Les Grecz le nomment Euronotus, pource qu'il est entre Aquilon et celluy qu'ilz disent Eurus. C'est aussi une ville en la campagne de Naples, ainsi appellée du nom d'un fleuve qui passe en elle, dont Sannazar faict assez de mention en son Arcadie.

X.

Xanthus est le fleuve qui souloit passer a Troye la grande, avant qu'elle feust ruynée par les Grecz, il se nomme autrement Scamander.
Xenie est autant comme hospitalité, ou reception chez soy de quelque amy estrangier pour la bonne affection que lon luy porte: ce mot signifie aucunesfois les dons ou presens que lon faict des vins, viandes, fruictz, et autres choses semblables.
Xenophanes fut un philosophe natif en la ville de Colophone, qui escrivit des Elegies et vers Iambiques contre Hesiode et Homere, a raison quilz disent des Dieux plusieurs choses qui ne luy sembloient recevables.
Xiste estoit antiquement un lieu a descouvert, ou les Athletes se souloient exerciter en agilitez et forces corporelles, comme une belle planure semée de sablon, et bien encourtinée de plusieurs arbres, c'estoit aussi (entre les Latins nonobstant qu'ilz ayent emprunté ce terme la des Grecz) les allées d'un jardin closes de Buys, Lavandes, Romarins, et autres hayes de telle sorte, curieusement tondues, et signifioit d'avantage une autre place a couvert, ou les jeunes hommes se pouvoient entresprouver, en temps de pluye et durant l'yver.

Z.

Zacynthe est une Isle de Grece, prochaine d'Aetolie, n'ayant en soy qu'une seule ville appellée de ce mesme nom: toutesfois son terroer est fertile au possible. Pline dict qu'elle est située entre Samos et Achaie.
Zama souloit estre une cité en Afrique, mais les Romains la destruyrent de fons en comble.
Zephire ou Favonius est un vent qui se lieve ordinairement toutes les années au commencement du Printemps, et est appellé Zephire en Grec, pource qu'il apporte quant et soy toutes les choses qui sont convenables a la vie.
Zele signifie aucunesfois envie, aucunesfois amour, et aucunesfois emulation, ou volunté que lon à de surmonter, ou du moins se rendent pareil a un homme en quelque chose.
Zenon fut un philosophe natif en la cité d'Erlée en Cypia, auditeur de Parmenides, ce Zenon trouva la Dialectique, ou invention de disputer artistement pour congnoistre le vray du faulx, et une fois qu'il avoit encouragé quelzques jeunes gentilz hommes de son pays pour le remettre en liberté, par la mort de Neanchus, qui l'usurpoit a force tele conspiration fut revelée au Tyran qui feit incontinent tourmenter le povre philosophe des plus estranges cruaultez dont il se pouvoit adviser, afin qu'il accusast ses compagnons, mais il n'en seut oncques tirer une parole servante a son intention, ains luy nommoit ses plus familiers et speciaulx amys, et entre ses tourmens declara qu'il vouloit dire un mot a l'oreille du Tyran, lequel incontinent se presenta, et adonc le povre martyr la luy arracha de la teste a belles dentz, puis tronsonna incontinent sa langue, et la luy cracha au visage. Quoy voyant les hommes du pays conciterent un grand tumulte entre eulx, et lapiderent le Tyran ainsi qu'il avoit merité.
Zodiaque est le cercle ou voye du Ciel, distinguée en Douze maisons pour les douze signes par ou passe le Soleil en faisant son cours pour une année.

Si quelzques faultes sont par inadvertance ou autrement advenues en la traduction de nostre autheur Vitruve. Je prie tous lecteurs raisonnables, qu'ilz en veuillent advertir le Libraire, afin qu'a la seconde impression cela se puisse reduyre comme il appartiendra, et de ma part je m'y employeray de sorte que chacun s'en devra contenter, par especial les ouvriers et autres gens qui n'entendent la langue Latine: Car je preten travailler pour ceulx la, et non pour les hommes doctes qui n'ont besoing qu'on leur esclarcisse les choses, ains les peuvent si bon leur semble, manifestement exposer a autruy, ou faire d'autres inventions assez profitables a nous et a la posterité si tant est qu'ilz ne se vueillent monstrer chiches des dons de grace par eulx liberalement receuz, tant de Dieu que de la Nature.